Dali rang ihatag ang pasaylo

“Imo ming gibiyaan, Oking,” ni Elena ngadtong Oking usa ka hapon dihang mikalit lang kining tumaw human sa daghang katuigan nga mibiya kini kanila. “Ug karon nia ka aron imo na pud kong pasakitan. Wala kay kaluoy sa imong anak, Oking, bisa’g sa imo na lang untang anak. Wala ka lang mananghid nako kun asa kang espidnoha paingon. Lima ka bulan kong sige’g pangita nimo, sige ko’g pangutana sa imong mga higala apan wala sila’y ikatug-an nako,kay wala sila mahibawo...”

“Nia ko, Len, kay gusto kong mag-uban na lang ta hangtod sa kamatayon uban kang dodong Litoy,” pahayag ni Oking.

“Ingon lang ana kasayon, Oking? Wala ka ba mahibawo nga nasakit ka usa si dodong Litoy, ug kaingon gani nako’g biyaan na ko sa akong anak, maayo lang gani kay may usa ka mitabang nako sa galastohan sa hospital ug naluwas si Dodong,” mora’g mipuwa ang mga mata ni Elena apan wala kini lugmawi sa mga luha. Anaa pa gihapon ang iyang gugma kang Oking apan dili mahimo nga makigbalik siya niini. Hinayhinayan na niya kini’g langkat sa iyang kasingkasing ...  ug si Andro na maoy iyang sugdan sa pagmahal, ang tawo nga mihaw-as kanila sa kalisdanan. Kun mahimo lang niya iyang anular sa korte ang ilang kaminyoon ni Oking. Usa kini ka yabag nga tawo, iresponsible, ug karon mihangyo nga makig-uli. No, dili ug  dili na siya makig-uli ning tawhana, mao kini karon hukom ni Elena.

Taudtaod miabot ang security guard ug gihangyo si Oking nga mobiya na sa balay nilang Elena. Si Andro maoy nangusog nga makapuyo gyud sila dinhi sa usa ka subdivision aron dili na matultohan sa iyang bana nga duna na say laing babaye nga maoy hinungdan sa pagbiya niini kanila ni Elena.

Sa gawas iyang nakita si Oking nga milakaw kuyog sa unipormado nga guwardiya sa subdivision. Sa hilom namulong si Elena, “Dugay ko na ikaw’ng gipasaylo, apan dili na gyud ko makigbalik nimo...”  (Katapusan) - Tomas Degum - Panadtaran, San Fernando, Cebu