Naghilak ang anak sa duwende

Wala nay nagpuyo sa mansion ni Mr. David sukad sila mamalhin didto sa Espanya. Tua man gud didto sa Espanya ang mga kaliwat ni Mr. David. Ang dakong balay nga mansion gibilin na lang sa usa ka gulangong lalaki nga maoy caretaker niini.

Ang anak ni Mr. David nga si Agustina dinha unta mopuyo apan kadiyot ra.  Apan dihang misugid ang ‘caretaker’ nga si Apolonio o Manong Apolon nga gibati’g kahadlok si Inday Agustina sa mga duwende.

“Ug si Inday Agustina mibalik na lang sa Espanya didto sa iyang mga ginikanan. Di ba gud intawon malisang ang dalaga nga sa iyang pagmata, wala na matud pa  siya’y sapot ug iyang nakita nga gialirongan siya sa mga gagmay’ng tawo? Ug ako siyang giingnan nga mga duwende to sila. Ug nahadlok kini ug wala magdugay sa mansion,” ni Manong Apolon pa.

“Gusto kong motan-aw sa mga duwende, Manong Polon,” ni Undo Minong ngadtong Manong Polon.

“O, sige, basin baya’g mahadlok ka. Ugma sa gabii, sulod ngadto sa mansion kay dili na lang nako gakotan ang dakong pultahan sa sala. Inig alas dose gyud sa gabii,” Tuod, pagka gabii, didto na si Undo Minong ug maoy iyang nakita nga alegre kaayo ang hawanan sa mansion. Dunay sound system ug lanog kaayo ang tingog sa gitugtog nga sonata. Unya kalit lang nahilom pag-abot ni Undo Minong.

“Uy, duna tay bisita, mga kaigsuonan ko,” nagkanayon kadtong tiguwang nga duwende nga tag-as kaayo’g bungot sa iyang suwang. “He, he, he, maayo hinuon kay siya ang atong pabantayon sa atong mga anak, he, he,  he he...!”

Ug daw  gihipnotismo si Undo Minong maoy gipabantay sa mga anak sa duwende nga natulog didto sa underground sa mansion ug iya kini silang gipaypayan sa dakong paypay. Pagkabuntag diha na si Undo Minong sa tugkaran sa mansion naghigda. Ug sa iyang pagbangon dihay puntil nga gihigot ug sa iyang paghiling sa sulod, mga bulawan nga singsing ug ariyos. “Ginoo ko, daw nagdamgo ko, apan tinuod kining tanan...” (Katapusan)