Ngano ba

Lalawigan sa Sugbo

“Ngano ba, Jinky? Ngano ba nga ikaw pa man gyud ang gipitik sa akong kasingkasing aron mahigugma pag-usab...?” nagkibutkibot ang baba ni Borgs ning gabhiona nga mipahiluna og higda sa iyang kama. Ang panagway ni Jinky mao na usab ang mihadla sa iyang kaisipan. Porbida! Natugkad niya nga nahigugma siya sa guwapang call center agent nga iyang silingan ug asawa sa suod niyang higala nga si Dado, usa ka ahente sa usa ka insurance company.

Sukad lang mabiyudo si Borgs, misamot ang kasiaw niya sa mga babaye, bisan mitungtong na siya sa edad nga 60 ug senior citizen na. Hayahay og  kahimtang si Borgs. Bulto niyang nadawat ang insurance benefits sa namatay niyang asawa nga regular nga kawani sa city hall ug sa pensyon niini sa GSIS. Lakip  usab si Borgs, magdawatan sa iyang binulang  pensyon sa GSIS isip retiradong maestro sa publikong elementaryang eskuylahan sa siyudad. Gawas pa, pinadalhan  usab siya og binulang allowance sa bugtong niyang anak nga babayeng nars nga naminyo og negosyanteng Amerikano nga atua na manimuyo sa Amerika.“Sir Bogz, breakfast na ka...?”

“Ayaw baya papasar sa lunch ha, Sir Borg...!” “Take your dinner on time ha, Sir Borgs...! Mao kini ang kanunay nga i-txt ni Jinky kang Borgz. May higayon sab nga mohapit si Jinky sa balay ni Borgs matag buntag, gikan sa iyang pag-duty sa call center nga gitrabahoan, aron pahinumdoman sa iyang pamahaw. Maoy hinungdan nga sa hilom, na-develop gyud ang gugma ni Borgs kang Jinky.

“Sir Borgs, inamahan lang ang pag-care ko nimo! Ayaw lang sagoli og laing kahulogan ha....?” igo lang nga nahikatawa si Jinky dihang giprangkahan ni Borgs sa pagpadayag sa iyang gibati niini. Apan nasayod si Borgs nga ginadili ang maong gugma, kay dakong minyo si Jinky ngadto kang Dado nga suod nga higala niya.

Ug sa kanunay, igo na lang sa pagtuaw si Borgs.  “Ngano ba? Ngano ba nga ikaw pa man, Jinky....?” Wala na lang tug-ani ni Borgs si Jinky, nga kadaghan na niya maangkon ang lawas niini, pinaagi sa iyang imahinasyon. Butangi! (Kataposan)