Mutya sa bukid

Gula 8

Pagkaugma sa buntag. “Sige ma, mo-duty na ko. Ingna lang ang akong mga ig-agaw nga moapas ra ko karong Domingo sa buntag didto sa Borbon aron mohatod sa menteryo ni Tiyo,” giingnan ni Ramon ang inahan.

Milarga usab si Nang Celia paingon sa Borbon pagka hapit na ang udto. Gitugon niini si Sheila nga dili magpasulod og laing tawo sa balay kun wala si Ramon. Nagkalingaw pagtan-aw og salida sa TV si Sheila aron sa pagwagtang sa kalaay nga siya ra’ng usa sa balay.

Takulahaw lang siya nga nakatulog. Karon pa nga makahigayon si Sheila pagkatulog kay maikog man siya nga matulog sa adlaw. Wala makabantay si Sheila nga may nakasulod sa balay.

Naigking si Sheila diha nga gipikpik og hinay ang iyang abaga samtang naghigda sa supa diha sa sala. Wala niya sirad-i ang pultahan sa balay sanglit nagsalig nga sirado ang gate.

Mura og naalimongawan si Sheila. Apan diha nga nabalikan na siya sa maayong panimuot, nakapahiyom siya pagkakita nga si Ramon diay ang mipikpik sa iyang abaga. Nakapahiyom siya’g hilaw. “Sayo ka lagi nga nahiuli Mon?” matud ni Sheila nga ingon sa nauwaw, labi na nga mura’g natukas ang gisul-ob niyang bestida ug naplastar ang puti niyang paa.

“Mipauli ko Sheil kay luya kaayo ang akong lawas. Mura’g gihilantan ko, init ang akong pamati sa lawas,” matud ni Ramon sa maluyahon nga sinultihan. Misulod dayon kini sa iyang kuwarto. Abtik kaayo si Sheila nga nag-andam og kape nga mainom ni Ramon. Sagad kini nga moinom gyud og kape inig-abot sa balay. Nagdala usab siya og panghaplas kay nakahuna-huna siya nga iyang masahean si Ramon aron dali ra nga mahuwasan. (Sumpayan)