Night market - Gula 9

Lapas na sa alas nuybe sa gabii nga namiya sa Plaza Independencia sila si Cesar ug Alma. Nag-holding hands sila nga nanglakaw paingon sa dalan Colon ug didto na sila nag-iyahay pagsakay paingon sa tagsatagsa nila ka pinuy-anan.

Pulos mapahiyumon sila si Cesar ug Alma nga nagpanamilitay sa usa’g-usa diha nga una’ng misakay og PUJ ang dalaga paingon sa Barangay Mambaling. Nag-atang usab og kasakyan si Cesar paingon sa ilang balay sa Kalunasan.

Pag-abot nila sa masi’g nila ka panimalay, nagbayloay na usab sila og text messages.

Bisan og wala sila magkita sa pipila na ka adlaw, apan wala batia og kamingaw si Cesar kay wala may hunong ang ilang pagteksanay ni Alma.

Adlaw’ng Sabado, gidapit ni Cesar si Alma nga manuroy sila ug manan-aw og sine. Wala mobalibad ang dalaga ug nagkasabot sila nga magkita sa downtown area.

Gikan sa downtown area, nanakay sila og taxi paingon sa SM aron adto sila manan-aw og sine. Sa taxi, didto sila nagtupad sa paglingkod sa luyo nga lingkoranan.

Gipasandig ni Cesar si Alma sa iyang tuo nga dughan aron nga sayon ra kaniya ang pagbalikis sa iyang bukton sa lumoy kaayong hawak sa dalaga.

Kun dili pa mauwaw si Cesar sa drayber sa taxi nga iyang nabantayan nga kanunay’ng nagpasiklap kanila pinaagi sa front mirror, kaganina ra niya nga gihagkan ang iyang girlfriend.

 Gipugngan lang ni Cesar ang kaugalingon kay sigurado man g’yud nga tagbawon niya ang iyang kamingaw ni Alma kun tua na sila sulod sa sinehan. (Sumpayan)