Mora’g nahadlok

Dear Tita Salie,

Have a wonderful day. Tagoa lang ko sa ngalan nga Ed, dili pa minyo apan duna ko’y kapuyo sa una.

Ang akong pangayoan og tambag kanimo, Tita, mahitungod sa among relasyon karon nga wala na ko kasabot kun na unsa na kini.

Almost two years usab nga nagtipon mi og puyo, Tita. Tungod lagi kay gusto ko nga dunay asenso ang among pagpuyo milarga ko sa laing dapit aron motrabaho. Ako lamang giantos ang kamingaw kaniya aron ko makakuwarta.

Dihay usa ka higayon nga mipauli ko sa among balay ug duna ko’y mga nadunggan nga estorya mahitungod kaniya nga kuno nagbinuang siya. Pero ang estorya, Tita, wala lang gyud nako panumbalinga kay duna ko’y pagsalig kaniya ug dili ko gusto nga magubot ang among pagpuyo.

Hangtud miabot ang panahon nga nananghid siya nako nga siya na sad ang manarbaho. Tungod kay maoy akong gusto nga malipay siya ako siyang gitugotan. Dihang nakatrabaho na siya natingala na man ko kay kun ako siyang teksan dili na siya mo-reply ug kun akong tawagan kanunay off ang iyang cellphone. Busa ako siyang giadto sa iyang trabahoan. Mora siya’g nahadlok nako, Tita. Ako siyang gibulagan pinaagi sa text, Tita, ug wala siya mo-reply. Wala nay klaro ang among relasyon. Unsa may akong buhaton? Palihog pasabta ko. Thank you so much and more power.

* * *

Dear Ed,

 Ayaw una dali-dalia ang hukom tungod kay wala ka pay nakita nga ebidensiya. Dunay daghang hinungdan kun nganong siya wala mo-reply sa imong mga text. Dunay daghang rason nganong dili makontak ang iyang celfon. Imo ba siyang gipangutana kun duna pa ba siya’y celfon? Kay tingali kun gikawat na kini o kaha gikuot samtang nagsakay siya og jeep paingon sa trabahoan o kaha gikawat kay iyang gibilin didto sa ilang boarding house ug nasayod na kita nga bisan asa dunay daghang hilabtanon.

Segurado ka bang nahadlok siya sa iyang pagkakita kanimo? Segurado ka ba kun unsay buot ipasabot sa iyang kahadlok nimo kun tinuod gyod nga nahadlok siya? Basin nahadlok siya kay anaa ka ug iso’g kaayo og nawong ug maglisod siya pagpakigsulti kanimo tungod kay anaa siya sa trabaho.

Ayaw una dali-dalia, pabilin una nga kalmado ang lihok ug hunahuna. Mas maayo seguro kun imo gyod siyang komustahon kun naunsa na siya, kun nganong dili siya mo-reply, kun nganong dili siya makontak kun tawagan. Imo una siyang komustahon kun naunsa na ang iyang trabaho, iyang kinabuhi kay tingali unya kun naglisod na siya apan iya lamang giantos aron dunay kwarta. Sakit kaayong hunahunaon kun sa iyang kalisod imo pa gyod gibulagan.

Busa sutaa una ang tanan una ka masuko kaniya.

-- Tita Salie