Ang ulitawo nga way nindot nga saput

Nadiskobrehan ni Nador, samtang nagkadako sila sa iyang kababata nga si Sena, misamot sila ka pobre samtang sila si Sena misamot ka datu. Misamot kaitom ug kagaspang ang iyang panit samtang ka Sena misamot kaputi ug kahamis. Nagkaanam ka bati iyang nawong samtang si Sena, nagkaanam ka gwapa. Nagkaanam kadaan ang iyang mga sinina, samtang ang kang Sena, nag-anam ka bag-o.

Sa laktod wa siya moasenso. Ang miasenso kaniya ang iya lang gyung gibati nga gugma ni Sena. Gugma nga mitumaw kadtong sila pa mga amaw, gamitoy ug wa pay mga buot. Napuno sila sa katawa ug hudyaka. Mora sila’g si Adan ug Eva sa “Paradise of Eden”.

Gumikan ning kahimtang ni Nador, nagtuo siya nga mausab na ang pagtagad ni Sena diha kaniya. Busa, samtang sayo pa unhan nalang kini niya sa paglikay. Graduating na si Sena sa high school samtang siya nahunong kay nagbaul. Apan wala mausab si Sena, anaa gihapon ang mga maayong pagtagad nganha kaniya. Ang matam-is niining mga pahiyum nga makapalukapa sa iyang kahiladman. Matino niya nga way bakak. Pure! Dili gold plated.

Apan alang kaniya dili na siya angayan ning maong mga pagtagad kay wa siya’y nahut nga pagkatawo. Mosamot siya’g kaubos. Busa dili na siya mobawos pagngisi. Dili na siya mobawos sa Apir! sa mga biso-biso ug sa mga gakus niini nga kaniadto maoy ilang naandan nga paghinangpanay sa matag adlaw nilang panagkita. Sa dili pa magduwa’g dakup-dakop, penpen de sarapin ug uban pa.

“Ngano nga di ka na man motagad kanako, Nador?” matud ni Sena. Ug nakita ni Nador, ang naglumbang pagdagayday sa mga luha ni Sena. Kusog pa sa dinagayday sa Pagsanjan Water Falls. Daw gikumot ang iyang kasingkasing sa maong nakita. Daw gikumot sa tigmasa’g siakoy. Gibaliktos, gilinubid.

“Kana tungod kay nausab kana Sena,” hinay apan klaro nga pagkasulti ni Nador.

“Ikaw ang nausab Nador, kay di kana managad sa bisa’g unsa kong pagtagad kanimo. Karon sultii ko. Unsay nausab nako?” singhag ni Sena.

“Nausab ka na Sena. Migwapa ka na pag-ayo. Mihamis ug miputi’g maayo ang imong kutis. Nindot kana kaayo’g mga saput. Daghan nang nanguyab nimo ug namisita sa inyong balay. Dili nako angayan sa imong mga pagtagad, Sena. Kay itom na kaayo ko. Bati na kaayo ko’g nawong. Pobre kaayo ko. Wa koy nindot nga mga saput. Mora nako’g si Fredrick F. Gelbolingo. Buot unta kong umakyat nang ligaw sa inyo,” pinugngan ang kakusog sa tingog ni Nador.

“A, ha? Tagalog pala ka,” nakatawa gamay si Sena. “Mao ra diay nang imong problema. Dawata ni,” ni Sena dayong kuot sa iyang shoulder bag. “Ha, P5,000? Unsaon man ko ni?” Nasiga ang mga mata ni Nador.

“Ipalit na’g mga nindot nga saput; polo, karsones, sapatos ug mga beauty products. Gusto man kaha kang manguyab nako. Maghuwat ko nimo, ha. Bantay ka,” ni Sena, nga paraygon kaayo’g tingog. Dayong halok sa ngabil ni Nador. Nagbutok-butok ang dughan ni Nador. Mora’g kabuthonon nga bulkan tungod sa kalipay. Milupad ang iyang espiritu nga nagkanta-kanta ug nagsista-sista sa kapanganuran sa kanta ni John Lennon nga “Oh My Love”. (Katapusan)