Ang Singer - Gula 3

Ikalima nga mikanta si Jane sa walo ka contestants ug gihugyawan siya sa katawhan dihang gikanta na niya ang Saving All My Love For You tungod sa iyang taas kaayo nga tingog nga nagbawod-bawod. Mao diay nga nakabantay si Redem nga may pagka kulong ang buhok ni Jane kay gisundog usab niya ang buhok ni Whitney Houston.

Nagpahiyom si Redem nga misud-ong ni Jane samtang mikanta sa sikat kaayo nga awit ni Whitney. Maayo usab kaayo nga miaksyon si Jane nga naglakaw-lakaw sa stage nga mora’g gibaliwala lang ang kataas sa tingog nga iyang gibuhian.

Bisan si Emil nga maoy producer sa amateur hour nasabtan ni Redem nga nakadayeg kaayo ni Jane nga miawit kay nagpahiyom kini samtang nagpahipi kilid sa stage. Sigurado na si Redem nga usa si Jane sa mga modaug bisan wala pa niya madungog ang ubang contestants.

Gilamano ni Redem si Jane human sa iyang pag-awit. “Sigurado na nga daug ka,” gihunghongan ni Redem ang dalaga. “Sure ka Redem? Maayo unta og modaug ko uy kay daghan ra ba karon ang naminaw sa amo didto sa Barili,” ni Jane pa.

Bisan si Jane nakabantay nga mas paborito siya sa mga tawo kay pwerte kalanog sa ilang mga pagakpak human niya’g kanta kaganina.  Gisugdan na ni Emil ang pagpahibalo kinsa ang mga mananaug. Gikulbaan si Jane kay dili iyang ngalan ang gitawag sa mananaug sa third prize.

Gipiyong ni Jane ang iyang mata kay nagpaabot siya nga tawgon ang iyang ngalan alang sa mananaug sa second prize, apan nasagmuyo siya kay dili siya ang midaug. Wala na magtoo si Jane nga modaug kay ang usa ka lalaki nga ilang kauban nindot usab kaayo nga mikanta sa Love Me With All of Your Heart.

Naglanog-lanog ang tingog ni Emil nga mipahibalo sa mananaug sa unang ganti. “Ang first prize winner karong gabhiona nga maoy makigsangka sa atong defending champion sulod sa upat na ka semana, mao si..!!!!!”

Gikulbaan kaayo si Jane. Nalantawan niya sa atbang kadtong lalaki nga kauban niyang contestant nga nagpahiyom na daan nga mora’g sigurado na nga siya ang modaug.

“Ang mananaug mao si Jane Fuentez!!!” Gisugat sa makabungog nga pagakpak ang pag-anunsyo ni Emil nga si Jane ang mananaug. Gipakanta pag-usab si Jane. Apil si Redem nga naglukso-lukso sa kalipay nga ang iyang amiga maoy midaug.

Gipakanta usab dayon ang defending champion. Daghan usab ang namakpak sa iyang pagkanta sa Constantly. “Mga higala, basi sa hukom sa mga judges, sugaton nato sa masipang pakpak, ang bag-ong kampyon!!! Jane Fuentes!!!” - Sumpayan