Andam na ba gayod ang gobiyerno sa kalamidad?

Usa ka urom sa mga biktima ang mapintas nga bagyo nga Ondoy ug Pablo nga nagbilin og masakit nga handumanan sa Pilipinas. Dili lamang ang Ondoy ug Pablo ang bagyo nga misulod sa nasud ang naghatag og dakong kalamidad, kahasol ug kahadlok sa mga Pilipino. Aduna pay uban nga nagmugna usab sa dakong baha ug landslide nga mikutlo sa kinabuhi sa mga tawo ug mga hayop ingon man nakaguba ug nakadaut pag-ayo sa agrikultura ug imprastraktura.

Kun adunay mahitabo nga ingon niini, ang gobiyerno dayon ang han-okan sa pagbasol. Kay kuno nagpasagad lang ang gobiyerno, nga wala’y gihimong pagpangandam  aron dili kaayo madako ang mga kadaut nga nahiagoman sa nasud ug sa mga tawo. Tinuod man usab hinuon kini. Sa bisan unsang kalamidad nga gituhoan nga mahitabo sa nasud, angay lang nga pangandaman sa gobiyerno.

Apan dili kay ang gobiyerno lang ang magpakita’g  pakabana aron malikayan ang dakong kadaut kun adunay bagyo nga mosulod sa Pilipinas ug ingon man sa kusog nga ulan. Ang indibiduwal nga Pilipino aduna usay papel niini. Ang matag usa nato mosuportar sa pagpangandam sa gobiyerno alang sa maong katuyoan. Usa sa hinungdan sa pagbaha mao ang barado nang mga kanal ug sapa tungod sa nagtipun-og nga mga basura.

Ang gobiyerno karon naghingusog nga gub-on ang mga barungbarong nga anaa sa daplin sa sapa ug mga estero. Tungod niining maong mga barung-barong daghang  mga basura nga nakabarado sa pagdis-og sa tubig. Ug kun adunay kusog nga ulan labi nag bagyo, makamugna dayon kini og pagbaha ug paglunop.

Ang nagpuyo niining dapita kasagaran magpataka la’g labay sa ilang basura. Ang tubig sa sapa ug estero gihimong basurahan. Wala maglantaw kun unsay ikadulot nga katalagman sa ilang gibuhat.

Aron mapangandaman gayod ang mahimong moabot nga kalamidad sa nasud nga mugna sa bagyo ug sa kusog nga ulan, kitang tanan molihok ug magpakabana sa maong problema. Kitang tanan ang apektado sa mahitabong kalamidad nga bunga ra  usab sa atong pagpasagad sa palibot. Ang nagpuyo sa daplin sa sapa ug sa mga estero angay lang nga mosanong ug mouyon kun gub-on sa gobiyerno ang ilang gipuy-an ug pabalhinon sila sa laing dapit. Dili kay ang gobiyerno lang ang mangandam sa gikahadlokan natong kalamidad kun dili hangtod usab kita isip indibidwal nga nahisugamak sa maong problema.