Guwapa nga Tindera

Gula 7

Naangkon gayud ni Max si Katrina. Daw dili makatoo si Max nga itugyan ni Katrina kaniya ang iyang kaugalingon. Apan natagbaw og alam-alam si Max kay mihilak ang dalaga human sa ilang pagparayganay.

“Guba na ang akong kaugmaon. Biyaan na unya ko nimo kay imo na man ko’ng nakuha,” hinay ug nagkurog ang tingog ni Katrina. Gihapuhap ni Max ang dughan sa dalaga ug gipahiran ang luhaan niini nga mga mata.

“Ayaw kabalaka Kat, dili ko ikaw talikdan. Hinuon, ako maoy mogasto sa imong pag-eskwela ug inigkahuman nimo, magminyo dayon ta,” pasalig ni Max kang Katrina nga maoy nakapahunong sa paghilak sa dalaga.

“Basta baya ha?” may kaparaygon ang tingog sa dalaga. Subli kini nga gihagkan ni Max ug giawhag nga manghilam-os sa banyo aron dili mahibaw-an sa iyang mga classmates nga gikan kini nga naghilak.

Migawas sila sa cottage ug miipon sa mga barkada nga didto na sa baybayon. Alegre kaayo sila nga nagbayloay og mga komedya samtang gidan-agan sa kahayag sa takdol nga buwan. Mibangka si Max og mga komedya sa grupo nga nakahaling og katawa.

“Makalingaw g’yud diay kining imong BF Kat uy,” matud ni Liezel nga nagpahiyom. Wala motingog si Katrina nga igo lang nagpahiyom samtang ang wala niini nga kamot gikalingawan og pislit-pisllit ni Max.

Kaadlawon na nga nagbuwag-buwag ang mga barkada ug namalik sa ilang cottage. Mibalik usab sila si Max ug Katrina sa ilang cottage.

“Kat, kun kita ang magkauban, gusto ko nga wala’y kataposan ang kalibutan,” hinay nga gilitok ni Max ang maong mga pulong dungan sa pagsakwat ni Katrina paingon sa higdaanan. Gipakaligo dayon niya sa mga hawok ang dalaga.

“I love you Max,” ni Katrina pa nga migakus ni Max. Dayon wala tuyoa nga nakapahiyom si Katrina. “Nganong mipahiyom ka man Kat?” nangutana si Max sa dalaga.

“Kuan, may nahinumdoman lang ko. Nganong gipangayoan man diay tuod ko nimo og contact numbers dihang gipalitan ko nimo og isda adtong una nato nga panagkita Max?” matud ni Katrina.

Mipitok-pitok ang mga mata ni Max. “Naibog nimo,” mubo nga tubag ni Max. Nagkataw-anay silang duha ug misunod ang pagparayganay. Dayon kalit lang nahilom pagbalik ang tibuok lawak nga ilang giistahan.

“Ipasalig nako nimo Kat, dili ko ikaw talikdan ug ikaw maoy akong dad-on sa altar sa simbahan,” pasalig ni Max uban sa hugot nga gakus ngadto sa dalaga.

Mibawos si Katrina pagpabatyag og hugot nga gakus kang Max. “Ikaw usab ang akong ubanan sa simbahan. Hehehe. Hala ka korni.” (Kataposan)