Man Hater

Gula 97

Nakugang si Salie – wala makalihok. Naunhan siya sa laing tawo. Nakita niya ang usa ka lalaki nga nagkagot ang mga ngipon ug nagsiga ang mga mata sa kapungot nga hilabihan nga nagkupot og armas. Gipunting niini ang armas ngadto kang Roger!

Bang! Bang! Mikidlap ang kalayo sa tumoy sa .45 sa tawo. Naigo si Roger sa nagkalainlaing bahin sa iyang lawas. Misarasay siya. Miliyokliyok. Nagkapalong na ang iyang panan-aw. Nagkaharag siya samtang nag-agulo. Unya natumba. Patay!

Nagkaguliyang ang mga tawo. Naglumbaanay paggawas sa simbahan. Si Lorrene Delampes nagminatay nga migakos kang Roger nga wala nay kinabuhi ug naligo sa kaugalingong dugo.

Ang lalaki nga nagpusil kang Roger wala mosibat. Malinawon kining mitahan sa kaugalingon pag-abot sa miresponding kapolisan. Sila si Chief Inspector Yuri Cuyos ang mitubag sa maong shooting alarm sulod sa simbahan. Nagkita sila si Salie.

Kay diha man gayod siya sa pagkahitabo, gipahimuslan na lamang ni Salie ang pagkuha sa tanang detalye sa hitabo alang sa iyang report sa Moon-Star Daily. Gikuhaan niya’g pamahayag ang mga ginikanan ni Roger ug lakip ang pangasaw-onon niini. Mikuyog siya sa headquarters ug gikuhaan og statement ang mamumuno nga nagpailang si Berting Ripalda. Wala siya maglisod pagkuha sa pamahayag ni Yuri, ang tinugyanan sa balaod nga nagsikop kang Berting.

Panimalos ang motibo sa pagpatay ni Berting Ripalda kang Roger. May igsuon si Berting nga gipamabdosan sa lalaki sama sa gibuhat ni Roger sa iyang manghod! Milikay si Roger sa kaakohan ug tungod sa sobrang kaguol, ang babaye nalisoan sa maayong pangisip. Maong gipanimaslan ni Berting si Roger.

Mirisi! Didto kini molugan-ob sa nagpaminting kahiladman ni Salie. Maayo ra nga natapos ang iyang kabanyaga! Ingon siya’g nalipay nga napatay si Roger sa laing tawo ug wala niya kamansahi ang iyang mga kamot sa dugo sa maong lalaki. -- Sumpayan pa