Man Hater

Gula 78

Human makainom, mibalik siya sa iyang lawak. Mihigda sa kama. Si Salie gihapon ang sulod sa iyang hunahuna. Labing seguro nahinanok na si Salie karon.

Nanghupaw si Yuri. Sa iyang banabana hapit na ang unang takna sa kaadlawon. Naikag siyang nagpamati sa hinagok sa iyang mga ginikanan. Gusto na gayod siyang mahikatulog. Apan nagdumili ang iyang mga mata. Nanghalang na lang kini sa pagpiniyong apan wala gayod siya makatulog.

Nianang pagkabuntag sayo nga naligo si Yuri. Bisan og abnormal ang iyang kinatulgan kagabii kay alas dos pasado na siyang nahikatulog tungod sa pagpunay’g hunahuna kang Salie (nawala na sa iyang hunahuna kadtong tawo nga iyang nakita nga misulod sa ilang lagwerta) apan sayo siya nga mibangon aron pagpangandam sa iyang kaugalingon. Daghan siya’g bulohaton sa opisina. Nagtipun-og ang mga kaso nga nagkinahanglan sa iyang pagtagad. Usa na niini ang pagkalot sa gamot sa kamatayon ni Debbie Balatan, ang patay nga nabangalan nila ni Salie ug Allan didto sa bakanteng lote.

Paggawas niya sa banyo maoy nasugat sa iyang mga mata si Rose, ang iyang manghod, nga nagbarog tungod sa pultahan. Mihatag kini’g lugar aron siya makaagi. Ug mibanos kini kaniya pagsulod sa banyo.

Midiretso si Yuri sa iyang lawak. Nag-ilis siya. Nagsul-ob siya sa iyang uniporme sa pagka-polis. Angayan siya sa iyang gisul-ob. Katahaan siya nga tan-awon.

Igo lang siyang nakahuman pag-ilis sa dihang may mituktok sa pultahan sa iyang kuwarto. Nahapalingi siya ngadto sa palid sa pultahan. Iya kining giserad-an.

“Yuri, mamahaw na.”

Nadungog niya ang tingog sa iyang inahan nga miagda kaniya alang sa pangaon.

“Mosunod na ko, Ma,” niya pa nga naghuping sa iyang buhok atubangan sa salamin. -- Sumpayan pa