Man Hater

Gula 71

Gabii. Wala nay timik ang kalikopan. Ang katawhan sa dakbayan nahinanok na taliwala sa nagkalawom nga kagabhion. Alas 11:30 na. Apan si Chief Inspector Yuri Cuyos wala pa mahikatulog. Naghayang siya nga naghigda sa iyang kama samtang ang iyang mga mata nagpitawpitaw nga nagtutok sa kisame. Wala siya duawa sa katulogon. May butang nga nakahasol pag-ayo sa iyang hunahuna.

Maoy diha sa iyang hunahuna si Salie Valle, ang maanyag nga reporter sa Moon-Star Daily. Matag karon ug unya mopasunding sa iyang handurawan ang matahom nga panagway niini. Dili gayod kini malangkat sa iyang kaisipan.

Nadiskubrehan ni Yuri sa iyang kaugalingon nga nahigugma gayod siya sa tinud-anay kang Salie. Karon pa siya mobati og ingon niini ngadto sa usa ka babaye. May kasinatian na siya sa gugma tungod kay may mga babaye na nga nahilambigit sa iyang kinabuhi kaniadto. Wala lang molambo ang ilang panagrelasyon sa maong mga babaye tungod sa lainlain nga mga hinungdan. Apan namatikdan ni Yuri nga lahi ang iyang gibati sa nangagi niyang mga trato kay sa iyang gibati karon ngadto kang Salie. Talagsaon uyamot ang pagbati nga iyang gihambin alang sa dalaga.

Wala siya’y gipahilak sa tanang mga babaye nga nahilambigit sa iyang kinabuhi. Seryoso siya bahin sa gugma. Maoy iyang baroganan nga ang maong butang dili katiawtiawan. Dili dulaan ang kasingkasing sa usa ka binuhat. Mao nga kun aduna na siya’y hinigugma, dili na gayod siya mangulitawo og lain. One-woman-man siya.

Kataw-an man gani siya sa iyang mga higala nga daghan og mga uyab. Bugalbugalan siya nga mora kuno’g dili siya usa ka lalaki. Apan wala kini niya tagda. Dili siya buot nga masakitan ang babaye nga iyang gihigugma. Mapinanggaon siya sa iyang hinigugma. Ug samtang managtrato pa sila, dili gayod siya makiglambigit sa laing babaye. -- Sumpayan pa