Naghilak nga Bituon

Gula 56

“Really?”

“Yes. Para complimentary sa among produkto.”

“Oh, Thank you.”

Subling nagpig-itay sa kamot sila si Jackie ug Flip sa nakagawas na sila sa kan-anan. Dayon nagbuwag na sila og dalan.

Samtang nagdagan ang Expidition ni Jackie nga gimaneho ni Noy Teryo balik ngadto sa townhouse nga iyang gipuy-an sa Laguna, si Flip ang nagduladula sa iyang hunahuna.

Ang wala damhang panagkaila nila ni Flip ingon sa naghatag kang Jackie og talagsaong kadasig. Nabatyagan niya nga gaan ang iyang buot ngadto sa maong lalaki bisan bag-o pa silang nagkahimamat.

Nakabantay siya nga hagkot kaayo’g tinutokan si Flip kaniya kaganina sa ilang panagsulti. Nakasabot siya nga ingon sa mibati si Flip og kaibog kaniya. Ug kini hilom niyang gikahimuot.

Hinuon, dili siya angay nga mosalig dayon kang Flip. Wala pa siya makaila sa hingpit sa maong lalaki. Wala gani siya masayod sa tinuod nga civil status niini. Tingalig minyo na ang maong lalaki.

Samtang kini ang iyang gihanduraw, mibagting ang cellphone nga gihatag ni Flip kaniya. Iya kining gikuha gikan sa shoulder bag ug gitubag ang tawag.

“Hello...” -- Sumpayan pa