Gula 79
“Sibay na,” ni Reno pa. “Dali! Kinahanglang dili ka nila hiabtan dinhi.”
Dihadiha misibat si Xenia dala ang brief case nga puno sa kuwarta. Midagan siya ug midagan subay sa eskinita. Dihang moliko na unta siya sa laing eskinita, nabati niya ang mga buto-buto sa mga armas.
Nahalingi si Xenia sa iyang gigikanan. Maoy iyang nakita si Reno nga bisan samdon na, maisogon gihapong nakigsangka sa mga tawong buot mopatay niini.
Bang! Bang! Bang! Bang! Bang!
Nakita ni Xenia nga mihay-ad si Reno dihang gipusil kini sa makadaghan sa usa ka tawong naggunit og taas nga pusil. Nakapiyong si Xenia sa iyang nakita. Nahulog na gyud si Reno sa mga kamot sa mga kaaway niini.
Mipadayon na sa pagsibat si Xenia. Kinahanglang dili siya masakpan sa mga tulisan nga nakapatay kang Reno. Midagan siya ug midagan. Miliko sa daghang mga eskinita hangtod nga nahiabot siya sa dakong karsada. Tayming nga may taxi nga nahiabot. Iya kining gipara ug misakay dihadiha.
“Asa ta, Ma’am?” Gipangutana siya sa drayber sa taxi dihang nakapahimutang na siya sa luyong lingkoranan. -- Sumpayan pa