Gula 22
Nasugdan dayon ang pagpahigayon sa operasyon sa iyang inahan human siya makahatag sa pasiunang bayad nga gipangayo sa ospital. Milungtad gyud og pipila ka oras ang operasyon. Naglisod ang mga siruhano sa pag-locate sa bala nga nalubong sa lawas sa inahan ni Xenia. Misuksok ang bala duol sa punoan sa atay sa iyang inahan.
Nahuman ang operasyon. Nakuha gyud ang bala gikan sa lawas ni Nanay Lourdes. Apan may laing problema si Xenia. Gihatagan siya sa doktor og daghang mga resita nga kinahanglang iyang paliton sa labing daling panahon.
Upat ka resita ang gihatag sa doktor kang Xenia. Ang mananambal mismo ang nagsulti kaniya nga pulos mahalon ang mga tambal nga giresita niini alang sa iyang inahan.
“Talandogon ang kahimtang sa imong inahan, Miss Maglabi,” nagkanayon ang doktor. “Bisan nakuha na ang bala gikan sa iyang lawas apan 50-50 pa gihapon ang chances nga maluwas siya. Kinahanglan gyud nga mapalit mo kanang giresita kong mga tambal aron ikadapat kaniya.”
Wala na masayod si Xenia sa angay niyang buhaton. Asa siya’g kuwarta nga ikapalit sa tambal nga giresita sa doktor alang ni Nanay Lourdes niya? Naglisod man gani siya’g panghagilap og kuwarta alang sa pasiunang bayad nga gipangayo sa ospital alang sa operasyon sa iyang inahan. Unya karon...may lain na sab nga suliran nga kuwarta gihapon ang kasulbaran!-- Sumpayan pa