Hangtod niining higayona, wala pa gayod mohisgot si Don Emilio kun pila na ang ilang nautang ngadto niini. Nagsige lang kini’g sanong sa higayon nga may ihangyo si Noy Sidro ngadto niini. Maikog na unta kaayo si Noy Sidro nga madugangan pa ang ilang utang apan unsaon nga wala man gayod sila’y laing kadangpan. Maayo na lang gani kay masinabuton kaayo si Don Emilio kanila.
Si Raymond misabot usab sa sitwasyon. Wala gayod kini makapadayon sa pagtungha sa kolehiyo gumikan sa grabeng kapit-os nga ilang nasinati. Miabag na lang kini kang Noy Sidro sa pagtikad sa umahan.
Si Urielle maoy nasangonan sa pag-atiman kang Nang Marciana. Makalakaw-lakaw na ang iyang inahan apan kinahanglan pa gayod kining bantayan. May mga higayon man gud nga maglisod kini sa pagpanghinimbang sa lawas ug delikado kaayo kun matumba. Wala pa gayod mahibalik sa hingpit ang kalagsik sa lawas sa inahan ni Urielle mao nga kinahanglang anaa siya kanunay nga moalalay niini.
Sa adlaw’ng Sabado ug Domingo, mobisita si Nelson kang Urielle. Hapit tibuok adlaw nga anaa si Nelson sa ilang balay. Sa higayon nga may buhaton si Urielle, si Nang Marciana maoy makigtubay sa pagpakigsulti kang Nelson. Gumikan sa kadugay na sa relasyon nila ni Urielle ug Nelson, ingon sa sinati ug suod na kaayo ang ulitawo ngadto sa iyang mga ginikanan. (Sumpayan pa)