Anino sa kulto

GULA 86

“Bisan unsa sila kaabtik, Dick,” ni Carlo pa. “Mahulog gihapon sila sa atong mga kamot.”

Gikan sa pinuy-anan ni Dr. Castro, wala na mokuyog si Carlo sa kapolisan ngadto sa kuwerpo. Nakahukom siya nga mopauli kay mihilab ang iyang tiyan sa kagutom. Wala pa siya makapamahaw. Apan samtang nagmaneho siya sa awto, kalit nausab ang iyang hunahuna. Misantop kaniya ang pagpakigkita sa kura paruko sa Mabini. Gusto niyang ikasulti ang pari.

Mitipas siya’g laing agianan. Sa usa ka eskina, nalantawan niya nga may naninda’g mga pagkaon sa daplin sa dalan. Gipahunong niya ang awto ug nanaog. Namainit siya’g puto ug sikwate. Iyang gisudlan og diyotay’ng pagkaon ang iyang tiyan aron dili siya mapasaran sa kagutom.

Human makakaon, misakay gilayon siya sa iyang awto ug mipahugong sa pagpadagan. Milahos na siya ngadto sa kombento aron pagpakigkita sa pari.

Gipahunong niya ang awto tungod gayod sa kombento. Nakita niya ang mga manimbahay nga nag-ulhos pagpanggawas gikan sa simbahan. Sa iyang nakita, misantop sa hunahuna ni Carlo nga malagmit mao pa gyu’y pagkahuman sa pari sa buntagon nga misa.

Nakahukom siya nga magpabilin una sa sulod sa sakyanan. Ang iyang mga mata didto ra sa ganghaan sa simbahan. Gipaabot niya nga mogawas ang pari. Nahunahuna niya nga mas maayo nga sa kombento niya kini pakigsultihi aron pormal ang ilang panagkabildo.

Apan milabay na lang ang napulo’g lima ka gutlo wala gayod mogawas ang pari sa simbahan. Si Carlo ingon sa gilaay na sa pagpaabot niini. Nanaog siya sa sakyanan. Mihukom siya nga adto na lang sa sulod sa simbahan niya daygi ang pari sa iyang tuyo. Basin madugay pa kini didto. Gusto siyang magkasulti dayon sila.

Misulod siya sa nag-arkong ganghaan sa simbahan. Mitadlas siya sa dakong agianan sa tunga-tungang bahin sa luag nga balay-alampoanan. Nakita dayon niya ang pari nga may gikasulti didto dapit sa may altar. Wala lang una siya moduol. Gihulat niya nga molakaw ang tawo nga gikasulti sa pari. -- Sumpayan pa