For your eyes only

Gisuhid og tan-aw ni Al ang naglaray nga mga imported nga bino sud sa usa ka daw estante sa gamay niyang bar sa sala sa ilang balay.

"Ubay-ubay nang mga bino nga akong nahipos gikan sa gawas sa nasud. Seguro tanlas nga imnon ang maong mga bino nga pinada sa akong anak nga atua sa Estados Unidos." Matud ni Al sa iyang kaugalingon.

"Lamia kahang imnon anang mga binoha bay no?" Tingog ni Paul nga suod niyang higala nga daw pagadunggan pa niya sa dihang miduaw kini sa miaging adlaw.

"Husto ka Paul. Basta gani gikan sa gawas sagad nindot nga imnon."

"Unya bay, nus-a man kaha ta makatilaw ana?"

"For your eyes lang na sila bay. Sige lang, kay sa sunod buwan moabot na ang akong uyoan nga nanakay og barko overseas. Magda jud to siya og bino sama niana kay maayo man sad tong muinom," pasalig ni Paul.

"Oy, kadugay pa diay ato bay Al. Petsa 3 pa ta karon," daw reklamong tubag ni Paul.

"Ay'g kabalaka bay kay dali ra kaayo rong mga adlaw mulabay. Martes ta karon, unya kalit lang mo Sabado. Kabantay ka ba bay Paul?"

Naputol ang paghanduraw ni Al sa pakighinabi kang Paul sa dihang mibagting ang telepono.

"Hello? Si Robert ni, pre," maoy nabati ni Al sa pikas linya.

"Oy, pare Bert, unsay ato?"

"Ari nya ta manihapon sa balay sa Sabado, pre kay birthday ni mare nimo Amor. Diay akong giandam nga imported nga bino. Dad-a nya si mare Milay. Kita-kita lang gud."

"Ok, pre manganha mi si mare nimo."

Nianang Sabado sa gabii, human sa makabuhong nga panihapon mipaingon ang managkumpare sa hawanan diin didto gipahimutang ang ilang ilimnon samtang didto sa beranda ang ilang masigkaasawa.

"Kining imong giandam nga bino pre susama sa bino nga imong gi-display didto duol sa atong gikan-an kaganina." Ni Al pa ngadto sa iyang kumpare.

"Mao bitaw nang gidisplay didto pre. Nakahunahuna man gud ko nga simbakog mawa nako sa kalibutan lain na hinuon unya ang makainom nianang mga binong gidisplay, di ba pre?" daw komedyang tubag ni Bert.

Sa dihang namauli ang magtiayon, milahos si Al sa gamay niyang bar ug gitan-aw ang naglaray niyang mga bino nga gikan sa gawas.

"Husto si pare Robert, lain na unya’y makainom anang mga binoha kun simbako mawa nako's kalibutan. Ugma kay Domingo, tawgon nako si Paul ug sugdan namo’g inom kanang bino." (Katapusan)