Tuktugaokkkk ... tuktugaokkkk .... tuktugaokkkk ... tuktugaokkkk!" mao na lamang ang nasawod sa akong dunggan ang way hunong nga tinuktugaok sa mga manok sa among silingan.
Kaadlawon na diay. Wa man god koy hunong og yawit ni Masyong, nga sa akong nasiklapan nga nahinanok na lang intawon. Kinsa man god nga asawa, ang dili sapoton, nga ning duha ka semana nga milabay, sukad mahuman ang sambunot nga piniliay, nagmantenir na man lang kaming duha si Masyong sa pagpunay og tumlod sa ona sa amahong?
"Tan-awa unsay nahitabo karon sa atong kahimtang Masyong, imbis makapalit kita og lab-as nga isda nga gibaligya sa may tiyanggihan ning atong lungsod sa San Fernando, namudlat na lang kining akong kalimutaw, gumikan sa imong kaluhag nga molangsad, isip Konsehal!" dihay kainggit sa akong tingog.
"Relaxs ka lang Noring," mubog tubag sa akong bana.
"Ingon gayod niana ang politika, diin adunay makadaug ug mapilde!"
Misamot gayod ang dili tiaw kong kasapot, ilabi na nga mahinumdom nga maayo kaayo nga pagkadala sa tama si Masyong, ni Kumpare namo Goyong, nga maoy nag-agni ni Masyong nga padaganon gayod sa pagka-Konsehal diin kini nagkanayon:
"Tugnaw pay manikop og uwang sa may sapa sa Pitalo, Pre Masyong nga maglayag ang imong kadaogan sa pagka-Konsehal ning atong lungsod sa San Fernando!"
Sa sinugdan, wa lang kadto hatagi og bili sa akong bana. Hugot niyang gibalibaran diin kini nagkanayon:
"Wa akoy budget Pre Goyong, nga magasto sa akong paglangsad!"
Ambot unsang pagkaunsaaa ... nga ang kahunit sa kagahi sa akong bana, sa kadugayan nakasugot ra man?
Gi-loan namo ang among yuta nga gitarokan sa among balay sa banko, hangtod nga nabaligya ang among anay nga umaanak ug miresulta ang bugtong namong kabaw nga igdadaro.
Way presinto nga nadag-an si Masyong. Kadasig nga miabot sa akong hunahuna, diin nasigpatan nako nga may mituybo dapit sa bilahan ni Masyong. Ako kining gikumkom ug naunsa ba hinuon nga ang akong gituhoan nga binandol nga salapi ... ang iya man diay nga buhi nga nagbitay sa bilahan sa akong bana ang mituybo sa kadako. (Kataposan)