May kaluha ang pagmahal

Pila pay edad sa imong bana ma'am, nangutana ang usa ka kaila. Trayenta lang na siya sa dihang na-estrok ug naparalisa ang katunga sa iyang lawas ug dili na siya makasulti," mitubag ang asawa. "Kun duna siya’y buot isulti, iya nalang isulat apan nahimo siyang sapoton kun dili masabtan ang iyang gisulat, ilabay ang bisan unsa nga iyang gihoptan. Ako ang kanunay nga maigo sa iyang ilabay.

"Unya, naunsa man nang iyang mata, ma'am, nga naa may gamay nga samad ubos sa tabontabon?"

"Daa, wa ko kaantos sa dihang gilabay ko sa ball pen, ako sab gilabay og balik, maayo na lang, wa maigo ang mata."

"Kun naigo pa, baldado na, buta pa."

Usa ka medical secretary sa usa ka doktor ang asawa, ug dihay usa ka higayon nga may magtiayon nga pareho nang tigulang ang mikonsulta sa doktor. Ang tigulang babaye, may Alzheimer's disease ug kini ang ipa-tsek-ap sa tigulang lalaki.

"Tagai ko'g makaon kay gigutom ko," matud sa tigulang babaye, dayong kuha sa tigulang lalaki sa biscuit sa bag. Tugob sa pagmahal nga gihungitan sa bana ang asawa.

Kalit lang misinggit ang tigulang asawa, "Kawatan! Kawatan! Nganong imong gihilabtan ang akong bag," dayong hampak niini sa payong ngadto sa iyang bana.

"Dili ako kawatan, ako ang bana mong si Galileo." Nahimut-okan ang babaye mora'g iyang gihunahuna kun tinuod ba nga bana niya si Galileo.

Taudtaod, nangutana ang sekretarya ngadto sa bana, "Pila na ka tuig nga may Alzheimer's ang asawa nimo?"

"Unom na ka tuig."

"Maayo na lang kay na-agwanta nimo ang iyang kinaiya."

"Ang tinuod nga pagmahal," mitubag ang bana, "may kauban kanunay nga pasensiya. Ug kana magagikan kanako kay ako ang walay sakit."

Nasina siya sa taas nga pasensiya sa tigulang lalaki. Naka-ingon siya sa kaugalingon nga iyang sundon ang taas nga pasensiya sa tigulang lalaki. (Katapusan)