Tangkod nang lima ka tuig, sukad nabiyudo si Miyoy kang anhing Nisya ug wa na gayod sa iyang bukabularyo nga magminyo pa sa pag-usab.
Nag-inusara na lang siya og tikaw-tikaw sa pagpuyo ning iyang payag. Gumikan ba kaha sa adlaw-adlaw na lang sa pagkutod sa iyang sanggotan, nakahunahuna na lang siya sa pagbalik og luto og budbod nga hilabihan ka himalitan nga iyang pangunayan og baligya sa ilang tiyanggihan ning lungsod sa San Fernando atol nga adunay tabo.
Kutob sa makatilaw sa linuto nga budbod ni Miyoy bation gayod og kagana, ilabina kang Benita nga bag-ohay pa lang nabiyuda kang anhing Siyoy.
"Magmahay gayod ako kanimo Yoy, kun dili ako nimo binlan sa imong budbod?" dihay tuno sa pagmahay ang sinultihan ni Benita.
Kilumkilom na lang wa gayod mopatim-aw si Benita aron balibaran si Miyoy. Hangtod nga nakatulog na lang siya gumikan sa kakapoy. Gibati na hinuon si Miyoy ug dili tiaw nga kabalaka kun unsa na kahay nahitabo nga wa man gayod mopakita kaniya si Benita.
Baligho sa panahon dili lang gayod hibaw-an. Gihilantan si Miyoy ug wa na siya makaluto pa og budbod.
Sa dakong kahingangha, mikalit lang og butho sa iyang payag si Benita.
"Sorry kaayo Yoy, nga wa ako makasulti kanimo, aron unta ikaw akong balibaran, gumikan sa kakusog adlaw-adlaw sa pagbundak sa ulan," ni Benita pa nga ang ganay sa iyang tingog subra kaparaygon.
Gisultihan ni Miyoy, nga usa na siya ka semana nga mibatang sa iyang higdaanan nga lantay, gumikan kay siya gihilantan.
"Sa ato pa diay Yoy, wa kana diay makaluto pa og budbod, nga sarang kong masima-sima?" ni Benita pa nga mabalak-on.
"Sulayi kuno kadtong akong linuto nga budbod kun wa ba mapan-os?" ni Miyoy pa nga mitudlo sa bukag nga gisudlan sa budbod.
Takulahaw mibundak ang ulan. Mi-brownout ang sugang dagitabnon sa VECO. Mao na lamang ang naamgohan ni Miyoy, nga ang nagbitay sa iyang bilahan, maoy gipunayan og ugay ni Benita diin kini nagkanayon:
"Maooo ... kiniiii ... anggg ... klaseeeee ... saaa budbodddd ... Yoyyyy ... angggg akong gipangita ... kay diliii mapan-ossss!" (Katapusan)