Expert pa sa bakasi

Gisuhid sa managhigala nga Ruben ug Christian ang downtown area sa dakbayan sa Sugbo kay nangita sila’g videoke bar nga adto sila makapadayon pagkanta kaniadtong Domingo sa gabii. Wala sila makontinto sa kinantahay nila didto sa balay sa kumpare nilang si Romy.

Wala sila makagusto sa mga videokehan nga ilang naadto kay daghang batan-on nga dili nila tipo ang gipangkanta, sabaan sila. May pangedaron na man god sila si Ruben ug Christian mao nga standard songs ang ilang paborito.

Natukmaan nila ang bag-ong gibuksan nga videoke bar diha sa dalan Sanciangko. Misulod sila sa Wildflower Videoke. Pag-abot nila sa may pultahan mao g’yoy pagtugtog sa intru sa kanta nga paborito diay ni Ruben - ang Wildflower sa Skylark.

Pulos standard ang mga kanta sa maong videokehan ug nadani sila pagsulod. Didto sila milingkod sa lamesa dapit sa suok kay gusto ni Ruben nga medyo ngitngit.

Giduol sila’g babaye nga mitunol ni Christian sa song book dayon gibutang sa babaye ang ball pen ug gamay’ng papel sa ibabaw sa lamesa nga maoy pasuwatan sa ilang mapilian nga kantahonon.

Nagpangidlap ang mga mata ni Christian ngadto sa babaye dungan sa paggunit sa kamot niini dayon gisukna kun unsay iyang ngalan. Apan wala magpabentaha si Ruben nga mitunol usab sa iyang kamot ngadto sa babaye nga nagpaila nga siya si Doris.

Human makahimo’g pipila ka lad-ok sa bugnaw kaayong beer, gikanta ni Christian ang Wildflower. Pastilan, nanghilom ang mga tawo pagsugod pa lang niya’g kanta kay kopya kaayo ni Christian ang tingog sa singer. Gisundan usab ni Ruben pagkanta ang “Only You” sa The Platters.

Daw sa napohalan g’yod nilang Ruben ug Christian ang ubang customers sa bag-ong gibuksang videoke bar kay mamakpak man ang mga GRO kun sila na ang mokanta. Si Doris nga nagbinugtong paglingkod sa usa ka lamesa nagsigi’g pasiklap kanila.

Pagbalik ni Doris sa lamesa nilang Ruben ug Christian kay mikuha sa numero sa kanta nga ilang buot kantahon, gipahimuslan ni Ruben ang pagpangayo’g contact number ni Doris ug mitanyag nga ihatud kini iniggawas sa babaye pagka alas tres.

Dili makatuo si Ruben kay wala balibari ni Doris ang iyang tanyag ug miawhag pa kaniya nga dili g’yod mosipyat sa pagkuha kay magpaabot g’yod siya. (Sumpayan)