Dili magsaba ang gaba

Way hunong ang kasubsob sa bakho ni Igong nga nagsud-ong sa iyang nahuman na unta nga gikaingin nga baol nga ang pagdaro nalang unta ang kuwang aron inig-abot sa ting-ulan masugdan na niya og pamugas?

Dili lang tuyoon, makapanakla siya nga maghunahuna ... kun dili pa lang sa kahinayak gumikan sa nag-uros-uros niyang gugma kang Imak, dili man unta madespatsar og baligya ang iyang bugtong kabaw nga igdadaro nga kabilin pa ni anhing tatay niya Pelis.

"Sobra pa unya ang imong hitagamtaman Igong sa panahon mosugot ka nga imong ibaligya sa may Lorega ang imong kabaw?" mihana og pisil si Imak kaniya sa kakubalon na sa iyang tudlo.

"A-pan ... Imak ... unsa pa man unya ang gamiton ko sa pagdaro, kun mabaligya ang akong kabaw?" hugot niya nga gibalibaran si Imak.

"Aw kun ingon ka diay kagahi nga hangyoon ... mas maayo pa kanimo Igong, ayaw na pagpakita kanako aron mamisita!" prangka nga gidaygan siya sa babayeng iyang gipakamutya.

Nalukmay ra sa kadugayan si Igong ug nabaligya gayod ang iyang kabaw.

Wa pa gani mamatog ang mga manok, timprano na nga namisita si Igong, sa pinuy-anan sa iyang hinalaran. Sa iyang hunahuna iya na gayod nga matagamtaman ang pagdimdim sa saro sa himaya sa kaputli ni Imak.

Dili man god ikalimod nga ning ilang balanay sa Bugho, si Imak, ang giilang labing guwapa ug wa nay sama. Makatulo god kini marayna sa may bukiran sa Bugho, atol nga gisaulog matag tuig ang pangilin.

Kahigwaos ug kahinam ang gibati karon ni Igong, sa paghitangka na niya sa may tugkaran sa pinuy-anan ni Imak.

"Maayongggg gabii ... maayonggg gabiii!" nagkapagaw ang tingog ni Igong nga nangayo og katahoran.

"Kinsay imong gipangita Igong?" mabalak-on nga nangutana kaniya si Uray Oprit.

"Asa man diay si Imak ... Uray Oprit?' nagkanguhal ang sinultihan ni Igong nga nagpakisayod.

"Ambot unsay nasulod sa ulo ning akong anak nga dalaga nga nakigtaban man ni Pikto?" luhaan ang duha ka mata sa inahan ni Imak nga namulong.

Duha ka buwan ang milabay. Dili na ganahan nga mokaon pa si Igong, sa nahitabo kang Imak. Buot na lang siya magpakamatay.

"Gong ... pasayloa intawon ako sa akong nabuhat kanimo, dakong minyo man diay kadto si Pikto ug karon ako nagsabak! ni Imak pa nga migakos kang Igong.

Igo lamang nga mihagawhaw si Igong ug nagkanayon:

"Dili magsaba ang gaba Imak!" (Kataposan)