Ang gugma sa biyudo

Sa didto pa ako sa Badian, nagpanuigon pa ako og 20 ka tuig, adunay buot mangasawa kanako nga biyudo nga ang ngalan si Gomer. Kuwarenta anyos na ang panuigon ni Gomer, asoy ni Belen. “Dili man kami trato. Wala ko pa man siya sugta apan mangasawa na kanako.”

Kamatuoran kuno nga si Belen iyang gihigugma mangasawa siya. Tuod man, namalaye siya. Nagdala siya ug mga linuto nga kan-on ug sud-an. Apan ang amahan ni Belen, nasuko kaniya. Kay ang iyang gikauban sa pamalaye ilang silingan, dili ang iyang mga ginikanan nga buhi pang daku.

Aron sa paglikay kaniya, mianhi si Belen dinhi sa Dakbayan sa Sugbu. Mingpuyo siya sa Lower Nivels Hills. Nadawat siyang usa ka katabang sa gitrabahoan sa ilang silingan. Sa duol sa ilang balay, adunay usa ka basketbolan. Matag hapon adunay magdula. Adunay usa ka ulitawo nga higala ug uyab sa iyang kauban sa balay nga moanha aron sa pagdula. Gipaila siya kang Roger, usa ka security guard. Nangulitawo si Roger kaniya. Apan wala siya makagusto kaniya kay may pagkabugoyon. Gibalibaran siya ni Belen. Apan siya namugos.

“Len, kong dili mo ako sugton, aduna ako’y mga barkada nga sa usa lamang nako ka pagsipol moatang kanimo aron ka among-amongan,” hulga ni Roger kaniya misugot na lamang si Belen kaniya tungod sa kahadlok. Dili ra ba siya taga didto niadtong dapita.

Usa ka hapon miingon si Roger nga moadto sila sa iyang iyaan aron ipailaila niya si Belen. Misakay sila og taxi ug mihunong sa usa ka balay. Misulod sila sa maong balay, dayon sa usa ka kuwarto. Wala didto ang iyang iyaan. Gibakakan diay ni Roger si Belen. Usa diay kadto ka motel. Walay nahimo si Belen. Naangkon gayud ni Roger ang iyang pagkababaye sa pasalig nga kini mangasawa kaniya.

Nagminyo sila. Gikasal sila sa usa ka Huwes. Sa ilang panag-uban isip magtiayon gitugahan sila og usa ka anak nga babaye apan sa ilang panag-uban sulod sa tulo ka tuig, nagkasakit si Roger sa kidney ug namatay.

Mipauli si Belen sa Badian hinambin ang tumang kaguol. Nagkita sila si Gomer. Nagpadayag siya sa pahasubo sa gidangatan sa iyang bana. Wala siya maghisgot mahitungod sa iyang gugma kang Belen. Apan sa mo-lima na tuig ang iyang anak, si Gomer mipadayon gihapon sa iyang tinguha kang Belen.

“Len, andam gihapon ako nga mangasawa kanimo ug mangamahan sa imong anak.” pasalig ni Gomer. (Kataposan)