Ang mga managhigala nga sila si Rey, Goddy ug Dodong ania karon sa pantawan sa balay sa naulahi. Nagkapundok na usab sila niining gabhiona aron pagtungab sa ilang kinahan nga alak.
Nagpaabot sila pagpagikan sa karaang tuig 2008 aron pagsugat sa bag-ong tuig 2009. Sa pasumbingay o idiom pa sa Iningles, buot nila ang pag-"bring-out the old and bring in the new."
"Mga alalay, hapit na man gyud moabot ang tukmang oras pagpanamilit sa daang tuig ug paghimamat sa bag-ong tuig, panahon na usab paghikyad sa atong mga New Year resolutions, matud pa ni Dodong.
"Bitaw, mao kining panahona nga mohisgot kita niini," midason pagsulti si Rey.
"Goody, unsa may imong ikasulti labot niini?" nagpakisayod si Dodong.
"Aw, dako kaayo kong uyon niini," ugdang ang pagsanong ni Goddy.
"Kun mao, ato nang sugdan ang paglatid sa atong mga new year resolutions," ni Dodong pa.
Gisugdan gilayon sa mga managhigala ang pagsaysay sa ilang mga resolutions. Nagpulipuli silag hikyad sa mga dautan nga mga butang nga angay nilang biyaan -- ilabi na ang pagbiya sa mga bisyo!
Unya, pag-abot gayud sa tungang gabii ang tumang kagahob gumikan sa pagbutobuto sa mga rebintador, basal sa mga taro ug lata, ug uban pang mga kahimanan paghatag og kasaba ug kaguliyang maoy mihari sa tibuok kalikupan.
Ug unya, taliwala sa hilabihang kasaba .... "Happy New Year! Happy New Year!" mihugyaw ang katawhan. (Kataposan)