Sukli sa utang

Gula 171

Pag-abot namo sa pier, wala na ko mokanaog sa sakyanan. Si Ferdinand ray nikuyog nila ni Nanay Isabel ngadto sa barko. Morag hilasan kong magpakaaron-ingnon nga maayo ko’g buot ngadto sa iyang inahan bisan ang tinuod nasilo ko sa iyang gisulti nako kaganina.

Mibalik dayon si Ferdinand sa nahimutangan sa among gisakyan dihang nakapahimutang na ang iyang inahan ug mga igsuon didto sa taas sa barko. Wala na lang mi magpaabot nga molarga ang barko. Namauli na kami ngadto sa condo unit nga among gipuy-an sa Alabang.

“May gipamati ka ba sa imong lawas, Editha?” Gipangutana ko ni Ferdinand samtang nag-ilis ko’g sinina nga pangbalay sulod sa among lawak.

“Wa man,” dali kong tubag. “Ngano man diay?”

“Mora man god og wala ka sa mood. Kaganina ka ra man nga way tingog-tingog, sukad sa pagbiya nato dinhi paingon sa pier ug hangtod na gani karon sa atong pagbalik.”

“Nahinumdom lang ko sa akong mga ginikanan,” namakak ko. “Gimingaw baya ko nila. Kun dili pa lang tungod sa akong kahiubos sa ilang gibuhat nako, dili ko unta sila hikawan sa pagtambong sa atong kasal.”

“Sagdi lang,” gialam-alaman ko ni Ferdinand. “Mamakasyon unya tang duha didto sa inyo sa Bicol kun andam ka nang makig-atubang sa imong mga ginikanan. Aw, di ba nia ra man sila dinhi sa Manila?”

“Oo. Pero kanunay silang mag-adtoan sa Bicol aron pag-atiman sa gamay namong yuta didto,” namakak na sab ko.

Unya, kalit lang nahimong romantiko ang higayon. Gigakos ug gihagkan ko ni Ferdinand. Wala ko motutol dihang iya kong gipahigda sa humok nga kama. Bisan og naguba ang akong adlaw gumikan sa gipanulti sa inahan ni Ferdinand nga wala nako mauyoni, kadali rang napukaw ang akong sexual urge. Ug in the mood for love na dayon ko.

Sulod sa among lawak mainiton namong gisaw-an ang kalalim sa lawasnong kahinam nga among gitagay. Gipiyong ko’g hugot ang akong mga mata samtang gitagamtam ko sa hingpit ang kalalim nga gidulot ni Ferdinand. Hangtod nga nagdungan mi pagsangko sa kinatumyan sa himaya.

“Maayo untag makaanak na ta,” nagkanayon si Ferdinand human sa among lovemaking session.

Wala ko makatingog. Supak sa akong kabubut-on ang gustong mahitabo ni Ferdinand. -- Sumpayan pa