Ang Babaye Sa Bentana

Misulod si Cyrus sa balay nga gipuy-an ni Cheska. Sa sala, mipahimutang siya sa sopa samtang ang dalaga nananghid nga moadto sa kusina. Gipasuroy niya ang iyang mga mata sa palibot. Nasuta  niya nga hamugaway ang maong balay alang sa usa   lang ka tawo nga magpuyo niini. Komportable.

Paghibalik ni Cheska gikan sa kusina, nagdala na kinig ice tea alang kang Cyrus. Human niya dawata ang baso nga gisudlan sa ilimnon, milingkod kini sa iyang tupad. Namatikdan niya nga madasigon kaayo ang dalaga.

"Mag-videoke ta," mihagad ang dalaga kang Cyrus.

"Salamat na lang," matud ni Cyrus nga nailhan lang ni Cheska sa alyas nga Warner. "Nahadlok kong di ka makagusto sa akong tingog. Di ko maayong singer.''

"It's okey. Maybe, mamati nalang ta sa akong Michael Learns To Rock ug Britney Spears collections."

"Ikaw ang mag-igo."

Nagpatugtog si Cheska sa iyang CD component sa sikat nga mga awit ni Britney Spears. Nalingaw sab si Cyrus kay usa man si Spears sa paborito niyang singer.

"Nganong wa ka man mag-hire og katabang aron may kauban ka sa pagpuyo dinhi?" Gikan ni Cyrus.

"Maoy gusto sa akong parents nga mag-inusara ko aron kuno makakat-on ko sa mga buluhaton," pasabot ni Cheska. "Dili kuno ko angay magsalig sa katabang labina nga usa ko ka babaye. Di sila gustong mahisama ko sa uban nga way hibangkaagan."

"May point sab ang imong parents. Pero dako ra ning ba'ya para nimo."

"Gusto nila nga di ko madisturbo sa akong pag-review maong entiro gyod nga balay ang ilang gipapuy-an nako. Aron maangkon nako ang hingpit nga privacy."

"Good idea."

Pagkagabii, wala dayon makatulog si Cyrus. Naghiwasa siya sulod sa iyang kuwarto. Nag-alindasay siya sa iyang higdaanan. Si Cheska ang kanunay nagdula-dula sa iyang hunahuna.