(Gula 12)
Gihiling ni Rey ang mga dokumento nga gihatag ni Althea kaniya. Gipaslak niya sa laptop computer ang disket nga dala sa dalaga aron pagsusi kun unsay sulod niini. Dihang naabli na ang disket, miyangoyango si Rey.
“Maayo hinuon nga gihatagan ko nimo niini,” ni Rey pa. “Makatabang kinig dako sa himuon kong imbestigasyon. Ikadugang ko kini sa info nga gihatag sa CIDG, PDEA ug BFAD nako kagahapon. Makapalig-on kini sa akong mga sukaranan.”
“Nakigkita ka diay sa taga CIDG, PDEA ug BFAD?” Sukit ni Althea.
“Oo. Gipasabot ko sila sa akong tumong ug mipasalig nga mokooperar sila kanako. Kini ang hinungdan nga gihatagan ko nila sa mga kasayoran nga gusto nakong mabatonan nga makatabang sa akong imbestigasyon.”
“Naulahi diay hinuon kog hatag nimo sa gikinahanglan mong mga dokumento.”
“Okey lang. Pareho ra nang tanan. At least, nia na nako ang mga material.”
Unya nagkatinutokay sila si Rey ug Althea. Sila ray nakasabot sa kahulogan sa ilang mga tinan-awan. Pagkilab sa mga daklit nag-akob na ang ilang mga ngabil sa pinadulot nga hinagkanay. Unya mikiat ang mga kamot ni Rey nga nanangtang sa mga salimbong sa lawas ni Althea. Hangtod nga managsama na silang duha nga pulos hubo.
Sa makausa pa, gisaw-an nila ni Rey ug Althea pagtagay ang dugos sa lawasnong kalipay ibabaw sa mahunolhunol nga kama sa mabugnaw’ng lawak sa hotel nga giokupar ni Rey. Nagtambayayong sila pagkatkat sa kinapungkayan sa ikapitong langit.
“Unsa ba gyud ko alang nimo, Althea?” Nakasukit si Rey sa dihang mihunas na ang gibati niyang kakutas human sa kombate nila sa kama.
“Nganong nakapangutana kag ingon niana?” Misumbalik pagpangutana si Althea.
“Tungod kay nakahatag kanakog tanghaga ang imong pagka babaye. Aduna nay nahitabo kanato sa makadaghan pero kun tukion, wala kitay relasyon. Wala gani kitay mutual understanding. Wala ka ba mahinugon sa imong pagka babaye nga imong gitahan kanako sa dakong kasayon?”
“Wala koy angay kahinugnan tungod kay nalipay ko sa nahitabo kanato.” -- Sumpayan pa