Kabanay nila Snooky ug Niño wala motambong sa kasal

Kumpirmado nga gikasal na sila si Snooky Serna ug ang batan-on ug rocker nga si Niño Mendoza, didto sa usa ka apartment nga gipanag-iya sa higala sa aktres.

Niadto pang Biyernes sa hapon sa nakalabay nga semana nahitabo ang kasal diin si Kuya Boy Abunda maoy maninoy samtang ang kolumnista sa PangMasa nga si Christy Fermin ug ang singer nga si Pinky Amador maoy mga ninang.

Matud ni Christy nga sila mismo ni Boy nahibong sa kapaspas sa mga panghitabo ug matud pa niya klaro kaayo nga dinali-dali ang kasal.

Usa usab sa mitambong mao ang abogado nga maoy nag-asikaso sa annulment sa kasal nila ni Snooky ug kanhi niya bana nga si Ricardo Cepeda.

Alas tres ang gikasabutan nga oras sa kasal, apan alas kwatro na lang nagtanggong si Snooky sulod sa usa ka lawak, hinungdan nga walay katapusan ang iyang pagpangayo og dispensa human masayod nga taod-taod na nga nagpaabot si Kuya Boy ug Christy.

'I was talking to my bestfriend kasi, sabi niya, hindi siya makararating, I felt bad, nalungkot ako, kaya iyak ako nang iyak kanina,''pagsaysay pa ni Snooky ngadto sa PangMasa.

Matud ni Christy nga ang kamanghurang anak lang ni Snooky ug Ricardo nga si Sachi, ang mitambong samtang ang kinamaguwangan nga si Sam wala didto apan miingon ang aktres nga nagkasabot na sila.

Suma pa nga nasayod nang daan ang inahan ni Snooky nga si Mila Ocampo nga magpakasal na sila ni Niño, ug matud pa nakasabot kini sa aktres.

Wala ang igsuon ni Snooky nga si Anton, bugtong si Sachi lang ang didto aron mosaksi sa seremonya busa nabatyagan ang tension sa seremonya.

Wala usab ang miyembro sa pamilya ni Niño apan miingon siya nga nasayod na ang iyang mga kabanay sa pagahimoong kasal ug matud pa ni Christy mas relax si Niño niadtong hapona itandi kang Snooky nga wala mahimutang.

Kanunay nga nagtupad sila si Snooky ug ang iyang anak nga si Sachi diin matag karon ug unya gakson sa aktres ang bata ug sultihan nga ''Baby, I love you very much, mama si here lang for you.''

Rocker gayud nga tan-awon si Niño sa iyang gisul-ob ilabi na tungod kay elevator shoes usab ang iyang gipares, samtang si Snooky simple rang tan-awon pula nga long sleeves nga sweat shirt, nagkalo kini nga iyang gitangtang sa dihang nagsugod na ang seremonya.

Gitug-an ni Snooky nga iyang gipahibaw si Ricardo sa maong kasal diin suma pa sa aktres nga gigakos siya og hugot sa kanhi niya bana kinsa mipasalig nga nakasabot kini sa kanhi niya asawa.

Sa pangutana kon mabdos ba siya hinungdan nga nagdali siya nga makasal wala pay konkreto nga tubag si Snooky tungod kay matud pa niya makigkita pa siya sa iyang OB-Gyne. ''Pero kung totoo ngang pregnant na ako, we're both happy, a baby is always a blessing,'' nagkatawa nga namahayag niini si Ms. Milagros Mendoza.