Christian nabuak ang kasingkasing

Nabuak as in nagutay-gutay ang kasing- kasing ni Asia's Pop Idol Christian Bautista human gisalikway na sa hingpit ni Rachelle Ann Go ang gihalad nga gugma sa ulitawo.

Giangkon ni Christian nga nasakitan gyud siya og maayo human nga giingnan siya ni Rachelle nga hunongon na ang iyang pagpangulitawo tungod kay buot ang naulahi nga mo-concentrate una sa iyang career.

Miingon si Christian nga labihan ang gibati niya nga kasakit tungod kay nagdahom siya nga magkauyab gyud sila sa nahisgutan nga singer tungod kay gamay naman lang gyud ang kulang nga mapatando niya ang dalaga.

Apan human sa pipila ka buwan nga matag Domingo siya magyampungad sa balay nila ni Rachelle gibasted siya sa nahisgutan busa gibubo nalang niya ang iyang atensyon karon sa iyang bag-ong album nga giulohan og "Christian Bautista Completely."

Daw gisungog si Christian sa higayon tungod kay nahimo niyang inspirasyon si Rachelle sa dihang gisuwat niya ang duha ka kanta sa iyang album nga nag-ulohan og 'Everything You Do ug Please Don't Go."

Sa dihang gisuwat niya kini wala pa siya mabasted ni Rachelle.

Samtang giangkon ni Christian nga nalipay siya sa bag-ong title nga gihatag sa mga tawo niya isip Asia's Pop Idol apan matud pa niya gikinahanglan pa niya nga mokaon og binakid nga bugas una niya bation nga haom na siya sa maong titulo busa iyang paningkamutan nga mas mapalambo pa ang iyang talento.