Lamian si James sa humba ni Kris

Lami ang humba nga giluto ni Kris Aquino atol sa programa sa GMA-7 nga Mobile Kusina niadtong Biyernes suma pa sa iyang batan-on ug basketbolista nga uyab nga si James Yap.

Humba maoy giluto ni Kris alang kang James sanglit mao kini ang pirmeng ipaluto sa basketbolista kaniya isip paborito niini nga sud-an.

Daghan ang nakapangutana nganong ni-guest ang premyadong aktres og tv host sa GMA-7 nga unta dili man kini maayo og relasyon sa nahisgutang network gawas pa diehard talent kini sa ABS-CBN.

Ang tubag mao nga ang major sponsor sa Mobile Kusina kinsa giduma sa maanyag nga host nga si Kristine Jacob mao ang Purefoods ug San Miguel Beer mga produkto nga gi-endorso sa aktres busa gikinahanglan ang iyang presensya.

Gawas sa humba nagluto usab si Kris og nilagang corned beef, syempre ginamit ang Chunkie corned beef nga maoy iyang gi-endorso diin gidayeg usab ni James ug Kristine ang kalami niini.

Kung kahinumduman si Kris nagsugod isip usa sa labing una nga hosts sa showbiz oriented show sa Kapuso network nga Startalk kauban silang Boy Abunda ug Lolit Solis sa wala pa kini mobalitok sa nataran sa Kapamilya pipila na katuig ang nilabay.