P1.4M shabu sakmit, pito ka durugista sikop

CEBU, Philippines — Pito ka Indibidwal ang nasikop ug duha ka drug den ang napuhag atol sa managlahi’ng Anti-Drug Operations sa Cebu ug Bohol diin kapin P1.4 milyon ang kantidad sa shabu nga nasakmit.

Ang Philippine Drug Enforcement Agency (PDEA)-7 ug Philippine National Police nipahigayon og sunod-sunod nga anti-drug operations sa Dakbayan sa Sugbo ug Probinsiya sa Bohol.

Sa maong mga operasyon niakabat ngadto sa P1,411,748 ang kantidad sa shabu nga nasakmit.

Mga alas 3:20 sa hapon niadtong Martes, tulo ka indibidwal ang gidakop lakip ang giila nga tigmentinar sa usa ka drug den atol sa operasyon sa PDEA Bohol, Tagbilaran City Police Station, ug Bohol Maritime Police ngadto sa Purok 6, Barangay Poblacion III, Tagbilaran.

Matud ni PDEA-7 Director Joel Plaza nga ang giila nga drug den maintainer mao si alyas “Mark”, 39, usa ka security guard ug residente sa maong lugar.

Ang duha ka giingong bisita sa drug den mao sila si alyas “Ong”, 33, walay trabaho, residente sa Barangay Poblacion III ug alyas “Francis”, 39, usa ka trabahante nga taga Barangay Camaya-an, Loboc, Bohol.

Nasakmit atol sa maong operasyon ang unom ka pakete’ng shabu nga nitimbang ngadto sa 16.61 gramo nga nibalor ngadto sa P112,948, buy-bust money ug nagkalain-laing drug paraphernalia.

Alas 7:18 sa gabii sa samang adlaw, usa ka 19-anyos nga lalaki ang nasikop atol sa hiniusang operasyon sa PDEA-7 ug Cebu City Police Office Station 10 atol sa buy-bust operation diha sa Tres de Abril Street, Barangay Labangon niining siyudad.

Ang suspetsado giila nga si alyas “Nicky”, walay trabaho ug residente sa Barangay Calamba niining siyudad.

Nasakmit gikan kaniya ang pito ka pakete’ng shabu nga nitimbang ngadto sa 175 gramos ug nibalor ngadto sa P1,190,000, buy-bust money, usa ka cellphone, usa ka motorsiklo ug uban pang non-drug evidence. Mga alas 8:15 sa gabii, laing hiniusang operasyon sa PDEA-7 ug Cebu City Police Office Station 10 ug tulo ka suspetsadong durugista ang nasikop ug laing drug den ang napuhag diha sa Katipunan Street, Barangay Tisa, Dakbayan sa Sugbo.

Nasikop sila si alyas “Junjun”, 44, giingong drug den maintainer; alyas “Ceno”, 46 ug alyas “Darwin”, 50, usa ka parking boy, ang tulo parehong residente sa Barangay Tisa.

Nasakmit gikan kanila ang walo ka pakete’ng shabu nga nitimbang ngadto sa 16 gramos nga nibalor ngadto sa P108,800, usa ka improvised scoop nga adunay residue sa shabu, buy-bust money ug drug paraphernalia.