GM sa CPA gisuspenso og unom ka buwan

CEBU, Philippines — Gisuspenso sa Office of the Ombudsman og unom ka bulan ang Cebu Port Authority (CPA) General Manager Francisco C. Comendador III tungod sa reklamo sa grave misconduct ug gross neglect of duty.

Ang suspension order, nga gipirmahan ni Ombudsman Jesus Crispin Remulla niadtong Agosto 20, 2026, mipabor sa preventive suspension nga gihangyo sa Oriental Port and Allied Services Corporation (OPASCOR) nga gi represent ni Atty. Atty. Resurrection Florimae C. Velasco, ang OPASCOR Executive Vice President ug General Manager.

Matud ni Velasco, nadawat nila ang kopya sa order niadtong Sept. 7.

Sumala sa Ombudsman, lig-on ang ebidensiya batok kang Comendador sa maong yugto sa kaso, apan wala pa niini hukmi ang merito sa administratibong reklamo.

Gireklamo sa OPASCOR si Comendador tungod sa iyang pag-uyon nga makadunggo ug makahimo og cargo operations ang mga barko sa Cebu South Harbor and Container Terminal Corporation (CSHCTC), usa ka pribadong pantalan, bisan pa sa mga limitasyon ubos sa CPA Administrative Order No. 02-2010.

Matud sa OPASCOR, misangpot kini sa pagbalhin sa operasyon sa pipila ka dagkong shipping lines, lakip ang Maersk ug CMA CGM, gikan sa Cebu International Port (CIP) ngadto sa CSHCTC.

Gipasaka usab sa OPASCOR ang mga alegasyon batok sa CSHCTC kalabot sa remittance sa kita, cargo-handling fees ug pagpalapad sa pasilidad lapas sa sakop sa permit niini.

Matud sa Ombudsman, mahimong makaapekto sa imbestigasyon ang padayon nga pagpabilin ni Comendador sa iyang posisyon tungod sa posibilidad nga makaimpluwensya siya sa mga testigo o makapanghilabot sa ebidensiya.

Ang preventive suspension walay sweldo ug dili molapas og unom ka bulan. Giingon sa Ombudsman nga preliminary measure lamang kini aron masiguro ang patas ug independenteng imbestigasyon.

Gimanduan usab ang Office of the Deputy Ombudsman for the Visayas nga ipatuman dayon ang suspension. Gisulayan sa The Freeman nga makuha ang komento ni Comendador pinaagi sa iyang staff, apan giingong kinahanglan pa nilang makuha ang iyang tubag sa maong isyu.

Ang OPASCOR usa ka kompanya nga nagdumala sa stevedoring, dock handling ug uban pang cargo-handling services. Ubos sa kontrata niini sa CPA, gitugotan kini sa pagdumala sa arrastre, stevedoring ug related cargo-handling services sa mga barko sa CPA-operated Cebu International Port, diin ang kontrata epektibo hangtod Pebrero 14, 2038. — MEL BANAT NEWS