Ginayuma?
Dear Dr. Love,
Matagal mo na akong masugid na tagasubaybay at ngayo’y ibig kong humingi ng payo sa iyo. Naniniwala ka ba sa gayuma?
Tawagin mo na lang akong Beth, 24, at may asawa’t dalawang anak. Limang taon na kaming kasal ng asawa ko at sa loob ng panahong ito, naging mapagmahal at ulirang asawa siya.
Pero nitong nakaraang limang buwan ay bigla na lamang siyang nagbago. Naging matabang ang pakikitungo niya sa akin at noong una’y nagtaka ako kung bakit. Nalaman kong mayroon pala siyang babae na kapitbahay pa namin. Hindi maganda ang babaeng ito. Mataba at maitim. Pero alam kong noon pa’y may gusto na siya sa asawa ko. Nahahalata ko ito sa kanyang mga panakaw na sulyap.
May reputasyon ang babaeng ito sa aming baryo. Isa siyang kilalang albularyo. Palihim pala silang nagdi-date. Ang sabi sa akin ng aking tiyo, malamang ay ginamitan ang mister ko ng gayuma. Ano ang dapat kong gawin? Sana’y matulungan mo ako Dr. Love.
Beth
Dear Beth,
Naniniwala ako sa kulam o sorcery sapagkat iyan ay nasa Biblia. Ngunit isinasaad ng Salita ng Diyos na ang mga nagpasakop sa Panginoong Jesus ay hindi na kayang saklawin ng ganyang kapangyarihan ng diyablo.
Taimtim kang manalangin sa Panginoong Jesus para sa deliverance ng iyong asawa. Magbulay ka sa Salita ng Diyos at matatagpuan mo ang paraan para makawala ang iyong asawa sa ganyang madilim na kapangyarihan.
Kapag natutulog na siya sa tabi mo, lapitan mo siya’t patungan ng kamay at sa Pangalan ng Panginoong Jesus ay itaboy mo ang masamang kapangyarihang gumagapos sa kanya.
Dr. Love
- Latest
- Trending