PANOORIN: Orly Guteza binawi ang testimonya, itinuro sina Marcoleta at Defensor

MANILA, Philippines — Binawi ng retiradong Marine na si Orly Guteza ang kanyang naunang testimonya sa Senate Blue Ribbon Committee at inakusahan sina Sen. Dante Marcoleta at dating kongresista Mike Defensor na umano’y humikayat sa kanya na gumawa ng mga alegasyon laban kay dating House Speaker Martin Romualdez.

Sa affidavit of recantation na nakuha ng Philstar.com, sinabi ni Guteza na wala siyang personal na kaalaman sa mga alegasyong iniuugnay kay Romualdez sa usapin ng flood-control projects.

Ayon sa kanya, nahikayat siyang tumestigo dahil sa mga pangako ng tulong pinansyal at scholarship para sa kanyang mga anak.

Iginiit din niyang hindi niya personal na nakilala si Romualdez at wala siyang nasaksihang umano’y pagdadala ng pera na bahagi ng kanyang naunang salaysay.