139 ka residente nakapahimulos sa livelihood assistance
CEBU, Philippines — Gigahinan og P695,000 gikan sa lokal nga badyet sa Lapu-Lapu City Government ang livelihood assistance alang sa 139 ka residente, diin matag benepisyaryo makadawat og P5,000.
Giapod-apod sa City Social Welfare and Development Office (CSWDO) ang pinansyal nga tabang atol sa usa ka distribution activity sa City Hall Atrium niadtong Huwebes, Agosto 13.
Ang P695,000 nga pondo giapod-apod ngadto sa mga benepisyaryo gikan sa nagkalain-laing sektor nga kwalipikado ubos sa Livelihood Financial Assistance Program sa siyudad.
Sa 139 ka nakadawat, 54 ang senior citizens, 30 solo parents, 21 LGBTQIA members, upat ka beneficiaries sa Aftercare Program ug 30 ka indigents nga miaplay pinaagi sa walk-in process.
Matag benepisyaryo nakadawat og P5,000 nga gitumong sa pagsuporta sa mga kalihokan nga makahatag og kita ug makatabang sa pagpalambo o pagpadayon sa ilang panginabuhian.
Kabahin ang assistance sa sustainable microenterprise development program sa siyudad, nga naghatag og pinansyal nga suporta sa mga kwalipikadong residente nga gustong magsugod o mopakusog sa gagmay nilang negosyo.
Giawhag ni Lapu-Lapu City Mayor Ma. Cynthia “Cindi” King-Chan ang mga benepisyaryo nga gamiton ang pondo alang sa mga livelihood activity nga makahatag og kita sa ilang pamilya.
Matud sa city government, gitumong sa programa nga mapalambo ang kapasidad sa mga benepisyaryo sa pagdumala sa ilang panginabuhian pinaagi sa pinansyal nga tabang alang sa livelihood projects.
Ang distribution gipadagan sa CSWDO, nga maoy nagdumala usab sa aplikasyon ug evaluation process alang sa programa.
Ang mga aplikante gikinahanglang mosumite og Certificate of Indigency ug Barangay Residency, voter’s verification certificate ug government-issued identification card. Kristin De Dios/MEL
Kinahanglan usab nila nga makakompleto og application form sa CSWDO Livelihood Unit ug mosumite og project proposal isip kabahin sa mga kinahanglanon sa aplikasyon. — /MEL (BANAT NEWS)
- Latest
