Tulo ka suspek pagpatay nangadakpan
CEBU, Philippines — Suspek sa pagpamusil sa usa ka 22-anyos nga lalake sa Brgy. Calamba, siyudad sa Sugbu niadtong Biyernes mihimakak sa pasangil nga siya maoy nagpatay niini ug may kalambigitan sa ilegal nga drugas ang motibo.
Namatay sa maong pagpamusil si Daryl Gonzales Bercede,taga Sitio Green Village, V. Rama Ave.,Cebu City. Ang suspek nga si Albert Ibon Caraballe, 46, mihimakak sa mga pasangil.
Si Caraballe dihang nakahinabi sa Banat News miingon nga panagbangi sa gang ang hinungdan sa pagpatay kang Bercede apan siya nahibulong kon nganong siya ang gipasanginlan.
Ang biktima daling gidala sa Vicente Sotto Memorial Hospital apan namatay gihapon kini. Nasikop ang suspek sa hot pursuit operation.
Samtang usa ka trabahante sa piggery nga suspetsado usab sa pagdunggab patay sa iyang kauban diha sa Barangay Cabadiangan, Liloan ang nadakpan sa follow up operation sa miaging gabii.
Si Superintendent Randy Korret, hepe sa kapolisan sa maong lungsod miila sa dinakpan nga mao si Jerry Gensan kinsa suspek pagdunggab patay kang Roger Hama, 46, human ang duha nagkalalis samtang nag-inom og bino. Sa laing bahin, usa sa Top 10 most wanted sa Tuburan tungod sa kasong frustrated murder nadakpan niadtong Sabado sa gabii sa Sitio Kalbasaan II, Barangay Kabangkalan sa mao gihapong lungsod.
Wa makaipsot si Baldwin Malinao, 35, kinsa 14 ka tuig nang nagtagotago gikan gipasanginlang midunggab kang Marvin Canuday kaniadto.
Apan niadtong Sabado sa hapon nadakpan kini samtang namista kauban iyang pamilya sa Sitio Siotes, Barangay Mag-alwa sa maong lungsod. - Jhan Nysse Capus ug Jomelyn Largado, Kathleen Kaye G. Gonzaga, CNU Interns (BANAT NEWS)
- Latest
