EDITORYAL - Paspasan, O tun-an pag-ayo

Milyones pesos ang giingong nawala gikan sa gobiyerno nunot niining pagkalangay sa implimentasyon sa Bus Rapid Transit (BRT) project tungod sa padayong walay pagsinabtanay sa mga dagkong opisyal sa kagamhanan. Sa pagkakaron, ang dugay na unta nga ipatumang BRT project anaa pa lang gihapon sa procurement process sa mga pribadong luna nga maapektohan diha sa 21 ka kilometro nga rota, apan sa gihapon wala pa kini masugdi hangtud karon.

Ang Commission on Audit miingon nga sa matag adlaw nga pagkalangay sa BRT, nagkadako usab ang alkanse sa gobiyerno. Ang pagkalangay niini ug pagdako sa alkanse, mabawi ra kon mahinayon na gyud ang maong proyekto. Dunay mga kabalaka ang mga supak sa BRT nga mas dako unya ang mawala sa gobiyerno kon mahinayon kini, kay matud pa tungod sa kagagmay sa mga karsada sa Metro Cebu makapasamot lang hinuon kini sa problema sa trapiko.

Dili tingali husto nga tan-awon ang alkanse sa pagkalangay, kon dili, ang losses kon matukod na kini, unya dili makasulbad sa problema ug basin makapasamot pa hinuon sa kahuot sa mga sakyanan.  Asa may maayo, paspas ang pagkahuman unya wala makasulbad sa problema, o malangay apan ini’g kahuman masolusyonan ang problema? Kining BRT, o bisan ang Light Rail Transit (LRT) pulos kini makatabang sa problema sa trapiko sa Metro Cebu nga nag-anam na og kagrabe.

Dili usab husto nga ang usa niining maong proyekto himuong alternatibo sa usa, hinoon mas maayo kon ang Metro Cebu makabaton sa BRT ug LRT projects. Ang importante lang nga may tumong ang pagtukod niini mao nga importante ang mga feasibility studies sa matag proyekto nga giplanohang himuon aron dili mausik ang gasto. Apan kinahanglan nga sa dili pa kini buhaton, siguraduhon gyud nga unahon ang pagpalapad sa kadalanan sa Metro Cebu.