EDITORYAL - Imbestigara gyud

Masabot kaayo nga walay gana ang kapolisan pag-imbestigar aron pagsulbad unta sa mga pagpamatay nga ang mga biktima gikatahapan nga mga nalambigit sa negosyo sa ilegal nga drugas. Kun kaniadto saba kaayo ang ubang tawo nga mosaway sa kapolisan nga wala makasulbad sa mga krimen, apan karon nagpakahilom na sila ug ingon sa nalipay nga gipangpatay ang mga gituohang drug pushers.   

Sigurado gyud nga apil sa mga tawo nga mipagakpak sa kalipay nga gianam-anam pagtudas ang mga gidudahang drug pusher, mao ang mga ginikanan kang kansang anak nahimong adik sa gidiling drugas.

Tinuod, dili lalim ang kaguol nga bation sa usa ka ginikanan kun ang ilang mga anak mahimong adik sa gidiling drugas tungod niining mga drug pushers nga ang gihuna-huna mao ra nga sila makakuwarta.

Dili usab tingali nato mabasol ang katawhan ning panahona nga sila napugos na lang pagsuporta nga pamatyon ang mga drug pushers tungod kay bisan og gihangyo pa sila sa tinarong nga moundang, nagpadayon man pagpamaligya og drugas.

Ang kadaghan sa mga drug pushers nga nadakpan sa kapolisan ug ubang law enforcement units maoy nakapapuno sa atong mga bilanggoan tungod kay ang balaod wala maghatag kanila og higayon nga makapiyansa. Apan samtang daghan ang mangalipay kun sila makadungog nga may lain na usab nga suspetsadong drug pushers nga gipangtipi sa mga polis kay misukol kanila atol sa operation, apan adunay kabalaka bahin sa mga kaso diin may mga tawo nga gipatay sa wala hiilhi nga mga mamumuno.

Dili imposible nga ang kampanya ni Presidente Duterte batok sa mga drug pushers gisakyan sa mga tawo nga pamatyon nila ang ilang mga kontra ug ipatuo lang nga kini nalambigit sa negosyo sa ilegal nga drugas. Kini maoy hinungdan nga ang kapolisan angay gayud unta nga mohingusog sa ilang paghimo’g imbestigasyon. Ang nakaparat lang kay sa kadaghang gipangpatay, dili na makaato ang mga polis pag-imbestigar.