Tipik sa Anino

Lawom na ang kagabhiun takna sa pagpahulay

Gihikyad ko na ang banig nga ginama sa kawayan nga inuway

Gipahimutang kong unlan sa uluhan ug gitakyap ang habol aron masaw-an

Mihigda ko ug mihuyatidbunga sa kakapoy sa lawas ug sa kaunuran...

Sa tibuok adlaw nga paningkamot ug pagkamas

Kanunay nga galuhod aron ugma damlag duna pay maluto nga bugas

Bisan paman sa pagpasipala sa mga bihuhat nga mangtas

Antuson ko nalang kay sa muuling magkamuritsing sa bonbon ug bas...

Misunod paghigda manghod kong walay pagpanuko

Mitakilid ako para kaming duha sa kadak-on niini mapaigo

Kay sa galapdon niini, angayan nga magtikuko

Basin sa sawog ako puniton magtingkagol maglagubo...

Pag-abag sa ginikanan sulundun niadtong gagmay pa mi

Makakaon lang og katulo kalipay na ang among maani

Wala kami mangandoy nga maamo ang tibuok kalibutan

Kay lumalabay ra man kita sa kalibutanong butang dili mawili...

Gatuo ang uban sa akong paningkamot mamahimong dautan

Apan wala man sila makahibawo sa pait kong kasinatian

Mao nga wala silay katungod kanako muhusga sa gibaktas kong dalan

Kay tipik lamang sa akong anino ang ilang nahibaw-an...