Tuyok, ferriswheel, sa yano mong pagtuyok
sama sa naghikyad ka’g talaadlawan,
Diin gihulagway ang tiunay’ng pagsulay...
sa mga nanagpakabuhi ubos ning silong
Sa nag-arkong bangaw sa kawanangan,
ug ang matag akto - may mga SUKNA
Nga naglilo sa galamhan sa tawo,
ug ang SULBAD katumbas sa langit —
Nga dili mahimong kahagdanan;
pinaagi sa mga pangandoy lamang.
Sa laktod, kitang tanan nga mga inumol
sa gamhanang kamot ni Bathala,
Sahi sa mga “nanagsakay” sa ferriswheel
nga nagatuyok apas-sumpay sa panahon,
Diin and mga gutlo sa kapalaran —
gihulagway sa nagbuylong paningkamot,
Kay mao may “Dula-sa-Kinabuhi”
diin kitang tanan nga mga binuhat
Gipalihok agad sa tukma nga laraw
sa gamhanan, langitnon nga Magbubuhat!