Road to Miss Universe ang pagrampa
CEBU, Philippines - Nagkadaiyang estilo sa pagrampa ang gipakita sa 86 ka mga kandidata sa 65th Miss Universe 2016 atol sa preliminary presentation nga nisikad sa miaging gabii.
Si reigning Miss Universe 2015 Pia Wurtzbach ug ang Kapatid star nga si Derek Ramsey maoy hosts sa maong show.
Atol sa ilang opening number, hugyaw na kaayo ang gipanul-ob sa mga kandidata nga gigama ug gipaluyohan ni Sherri Hill ug ang ilang foot wear nga gigama pud sa Chinese Laundry.
Niabiba pag-ayo ang mga tawo sa dihang ang pambato sa Pilipinas nga si Maxine Medina nirampa na sa entablado. Sa pasiuna niya nga pagrampa, gisul-ob niya ang Vinta-inspired yellow-gold national costume nga gialirongan og south sea pearls ug coral reefs nga nagkantidad og usa ka milyon ka pesos.
Human sa opening number sa mga kandidata ug sa wala pa magsugod ang swimsuit presentation, pormal nga gianunsiyo sa mga host ang naglangkob sa Preliminary judges nga silang Miss Universe 1993 Dayanara Torres, Miss Universe 2007 Riyo Mori, TV Star ug actress Cynthia Bailey, former journalist ug publicist Rob Goldstone, businesswoman Francine LeFrak ug executive producer nga si Fred Nelson.
Una nga mi-perform ug mirampa sa ilang catwalk skills ang mga kandidata sa Preliminary Swimsuit Presentation. Stand-out sila si Miss Philipines, Miss Mexico, Miss Venezuela, Miss Indonesia, Miss Thailand, Miss Spain, Miss Nicaragua, Miss USA, Miss Argentina, Miss Belgium, Miss Australia, Miss Sierra Leone, Miss Colombia ug Miss Miss Brazil. Crowd favorites sila si Miss Venezuela, Miss Philippines ug Miss Thailand nga nagpatalbugan sa ilang catwalk skills sa swimsuit presentation.
Human sa swimsuit presentation show, misunod dayon sa maong event ang Miss Universe Preliminary Evening Gown presentation . Suma pa sa mga obserbasyon nga elegante kaayo nga tan-awon mao sila si Miss Spain, Miss Venezuela, Miss Mexico, Miss Dominica Republic, Miss USA, Miss Australia, Miss Brazil, Miss Thailand ug Miss Philippines. Crowd favorites sad sila si Miss Venezuela, Miss USA ug Miss Philippines.
Gisul-ob ni Miss Philippines Maxine Medina ang iyang green gown. Ang Preliminary Swimsuit ug Evening Gown maoy basehan kun kinsay mapili ug masulod sa Top 12 semi-finalists ug lakip na ang Preliminary Interview nga gipahigayon sa miaging adlaw. Makahatag usab og kontribusyon ang Miss Universe Global Fan Voting diin may kahigayonan ang fans sa tibuok kalibutan sa pag-vote sa ilang paboritong kandidata. Jonald E. Raganas (BANAT NEWS)
- Latest
