Mga estruktura daplin sa sapa sa Binaliw ipasusi

CEBU, Philippines — Gipadangat ni Konsehal Pastor “Jun” Alcover Jr. sa konseho sa Dakbayan sa Sugbo ang dugay nang reklamo sa mga residente bahin sa giingong mga istruktura nga gitukod daplin sa sapa sa Binaliw sa bukirang bahin sa siyudad.

Sa iyang privilege speech niadtong Setyembre 15, 2026, matud pa ni Alcover nga ang isyu naglangkob sa mga konstraksyon nga naglambigit sa Bayanihan Flats–Orchard Drive project diin gikataho nga naglambigit sa Piccadily Premier Land, Inc.

Matud pa sa mga nangreklamo nga ang propiedad gibaligya ngadto sa Deca Homes ug gipalambo ubos sa King Properties Developer.

Nabalaka ang mga residente tungod sa padayon nga pagtukod og mga retaining wall ug uban pang estruktura daplin sa sapa nga giingong nag-anam-anam og kagamay ang natural nga agianan sa tubig.

Gihisgutan ni Alcover ang ocular inspection sa Cebu City Environment and Natural Resources Office (CCENRO) niadtong Septiyembre 5, 2019 human adunay mga reklamo gikan sa mga residente.

Base sa inspection report, giingon nga walay napakita atol sa inspeksyon ang pipila ka gikinahanglang permit ug clearance lakip ang Environmental Compliance Certificate (ECC), Building Permit, Permit to Cut, Quarry Permit, ug uban pang dokumento nga gikinahanglan.

Mas seryoso sab ang nasayran sa CCENRO tungod sa gitukod nga retaining wall daplin sa sapa nga wala kini nahiuyon sa Article 51 sa Presidential Decree No. 1067 o Water Code of the Philippines.

Gipasabot ni Alcover nga ang river easement dili ordinaryong bakanteng yuta kondili usa ka protektadong luna nga gikinahanglan aron magpadayon ang natural nga pagdagayday sa tubig ug makahatag og proteksyon batok sa pagbaha.

Gawas sa mga istruktura, nireklamo sab ang mga residente nga nausab na ang tubig sa sapa sa Binaliw sa paglabay sa panahon tungod kay kaniadto mahimo kining magamit sama sa pagpanglaba apan karon giingon nga dili na kini nga mapuslan tungod kay adunay baho ang tubig ug dili na sab tin-aw.

Base sa rekord, giingong giila sa Piccadily nga wala pa kini kakuha sa gikinahanglang government clearances ug permits alang sa retaining wall ug misaad nga undangon ang konstraksyon.

Apan base sa obserbasyon sa mga reklamante nga nibalik ang pagtukod niini atol sa holiday period ug adunay lain pang istruktura nga gitukod lakip ang usa ka taytayan nga mitabok sa sapa.

“Dili kita angay maghulat sa sunod nga katalagman una nato pangutan-on kon naprotektahan ba gyud ang atong mga sapa,” matud sa konsehal.

Tungod niini, nihangyo si Alcover nga magpahigayon og Executive Session aron masusi ang kasamtangang kahimtang sa mga istruktura sa sapa sa Binaliw.

Gusto niyang ipatawag ang mga representante sa CCENRO, Office of the Building Official (OBO), City Legal Office (CLO), Piccadily Premier Land, Inc., Deca Homes, King Properties Developer, mga barangay captain sa Binaliw ug Pit-os, mga apektadong residente, ug uban pang nalambigit nga ahensya sa gobyerno.