Papel ng media ‘crucial’ sa laban vs fake news – Pangulong Marcos

MANILA, Philippines — Kinilala ni Pangulong Ferdinand Marcos Jr. ang katapangan at ang mahalagang ginagampanan ng mga mamamahayag para labanan ang mga maling impormasyon.

Ang pahayag ng Pangulo ay ginawa sa pagdiriwang ng World Press Freedom Day nitong Biyernes, kung saan binigyan nito ng pagpapahalaga ang media industry at kinilala ang mga hamon na kinakaharap ng mga mamamahayag sa Pilipinas.

Ayon pa kay Marcos, sa Bagong Pilipinas ay pinagdiriwang ang mga journalists dahil sa kanilang unbiased reports, at nananalig sa kanila para maipagpatuloy ang katotohanan at transparency.

“As the fourth pillar of our democracy, their words serve as our strongest defense against misinformation and fake news. Now, more than ever, their commitment to their work is crucial,” ayon pa sa Pangulo.

Ayon sa Malakanyang, kamakailan lamang ay naging biktima ang Pangulo ng anya ay disinformation campaign sa pamamagitan ng audio recording na kanyang ipinapag-utos sa militar na kumilos laban sa isang bansa.

Hinihinala naman ng Presidential Communications Office na isang foreign actor ang nasa likod ng recording.

Ang Mayo 3 ay idineklara ng United Nations General Assembly  bilang “World Press Freedom Day” para magbigay ng kaalaman sa kahalagahan ng freedom of the press at right to freedom of expression.