‘Hindi kami duwag’ - PCG

Sa batikos bakit ‘di pumalag sa water cannon attack

MANILA, Philippines — Binalewala ng Philippine Coast Guard (PCG) ang mga pambabatikos ng publiko hinggil sa hindi pagganti sa pinakabagong harassment ng China Coast Guard sa sasakyang pandagat na maghahatid ng suplay sa Bajo De Masinloc, at sa halip ay nilinaw na sinikap nilang iwasan na mas tumindi pa ang tensyon.

Sinabi ni Commodore Jay Tarriela ng West Philip­pine Sea Transparency Office ng PCG na may sinusunod silang chain of command at tiwala sila sa patnubay ng Pangulo.

“We have a chain of command. We respect the guidance of our president,” ani Tarriela sa news forum nitong Sabado.

“The guidance of the president is that we should not be provoked, we should not be the reason of intensifying the escalation for China to justify to once again bring the next level of aggression,” ani pa ni Tarriela.

Kinanyon ng tubig ng CCG at binangga ang PCG vessel na BRP Bagacay at Bureau of Fisheries and Aquatic Resources (BFAR) vessel na BRP Bankaw noong Martes. Nangyari ito habang ang Beijing ay nagpapatuloy sa paggigiit ng mga claim sa mga tampok sa loob ng West Philippine Sea.

Ang mga pag-atake ay nagresulta sa mahigit P2 milyong halaga ng pinsala sa rehas at canopy ng mga barko. Kabilang sa mga nakasakay sa mga barkong Pilipino ay mga miyembro ng media.

Iginiit pa ni Tarriela na unfair na sabihan silang mga duwag dahil ginagawa lamang ang kanilang tungkulin.

“But we cannot do otherwise because we have to comply and we know for a fact – we trust our commander-in-chief, the National Task Force-West Philippine Sea, of course the National Security Adviser – but we have to maintain professionalism in dealing with this kind of bullying of the Chinese Coast Guard,” aniya pa.

Ang pinakahuling sunud-sunod na pag-atake ay ginawa kahit na matapos na pinawalang-bisa ng Permanent Court of Arbitration ang 9-dash line claim ng China sa halos kabuuan ng South China Sea noong 2016.