DOTr Sec. Bautista suportado ng shipping, logistics industry

MANILA, Philippines — Buo pa rin ang tiwala at suporta ng ibat-ibang grupo na kabilang sa shipping at logistics industry kay Transportation Secretary Jaime Bautista kasabay nang paghikayat kay Pangulong Ferdinand Marcos Jr. na ituloy ang tiwala at kumpiyansa sa kalihim.

Ito’y sa gitna ng mga akusasyon ng katiwalian sa Land Transportation Franchising and Regulatory Board (LTFRB) na nasa ilalim ng Department of Transportation (DOTr).

Isang dating empleyado ng LTFRB ang nag-akusa na may katiwalian sa ahensiya na agad din nitong binawi at humingi ng paumanin kay Bautista at sa sinuspindeng chairman ng LTFRB na si Teofilo Guadiz III. Nagsampa na rin ng kasong kriminal si Bautista laban sa mga taong naninira at nag-aakusa sa kanya.

Pahayag ng grupo, sa loob lamang ng 15 buwan sa puwesto, pinatunayan ni Bautista na may kakayahan siyang baguhin at ayusin ang sektor ng pandagat ng bansa upang mapaunlad ang pambansang seguridad at ekonomiya sa makabago at global na mundo.

Kabilang sa mga nagpahayag ng suporta kay Bautista ang mga pinuno ng shipping at logistics na sina Dennis Llovido, ng Supply Chain Management Association of the Philippines (SCMAP); Fernando Juan Perez, Philippine Multimodal Transport and Logistics Association, Inc. (PMTLAI); Nelson Mendoza, United Portusers Confederation of the Philippines, Inc. (UPC); Connie Tinio, Alliance of Concerned Truck Owners and Organizations (ACTOO); Roger C. Lalu, Association of Container Yard Operators of the Philippines (ACYOP); Patrick Ronas, Association of International Shipping Lines, Inc. (AISL); Mark Matthew F. Parco, Philippine Liner Shipping Association (PLSA); at Joselito Ilagan, Philippine Ships’ Agents Association (PSAA).