MTRCB execs pinagbibitiw sa ‘Barbie’
MANILA, Philippines — Pinagbibitiw sa puwesto ni 2nd District Cagayan de Oro City Rep. Rufus Rodriguez ang mga namumuno sa Movie and Television Review and Classification Board (MTRCB) sa pagbibigay ng ‘green light’ sa pelikulang ‘Barbie’ para maipalabas sa bansa.
Ayon kay Rodriguez, isang malaking kahihiyan ang desisyong ito ng MTRCB sa Pilipinas lalong-lalo na kay Pangulong Ferdinand Marcos Jr.
Sinabi ni Rodriguez na dapat ng magsipagbitiw ang mga executives ng MTRCB sa kabiguang suportahan at panindigan ang nasyonal na interes ng bansa.
Ginawa ng solon ang panawagan kasunod ng desisyon ng MTRCB na payagan ang commercial release ng pelikulang “Barbie” ng Warner Bros sa bansa sa darating na Hulyo 19. Ang pelikula ay pinagbibidahan ng Australian actress na si Margot Robbie.
Inihayag ni Rodriguez na hindi dapat ipalabas ang ‘Barbie’ sa bansa dahil naglalaman ito ng depiksiyon sa reference ng China sa pinalawak na nine-dash-line territorial claim sa pinag-aagawang South China Sea kabilang ang ilang bahagi ng 200 milyang Exclusive Economic Zone (EEZ) ng bansa.
Aniya, lubhang kakatawa na mismong ang Vietnam ay ipina-ban ang pelikulang ‘Barbie’ dahil sa kaduda-dudang nilalaman ng peikula sa naturang 9-dash-line ng China pero tila ang MTRCB ay nais pang i-promote ang walang basehang pagpapalawak ng nasasaklaw na teritoryo ng Beijing sa WPS kabilang na ang mga inookupa ng Pilipinas.
“The board’s decision is doubly shameful and doubly ironic in the face of yesterday’s expressions of support by the United States and numerous countries, the latest of which is India, for our 2016 arbitral victory,” anang Mindanao solon.
Ikinatwiran naman ng MTRCB na naniniwala ang Board na lahat ng bagay ay ikinonsidera at wala ring basehan para i-ban ang pelikulang ‘Barbie’ dahil wala naman aniyang malinaw na depikson ng 9-dash-line sa parte ng pelikula.
- Latest