TRO vs anti-terrorism act muling iginiit sa Supreme Court
MANILA, Philippines— Muling umapela ang ilang grupo sa Korte Suprema na humihiling na bilisan na ang pagpapalabas ng temporary restraining order (TRO) laban sa pagpapatupad ng kontrobersiyal na Anti-Terrorism Act of 2020.
Sa 12-pahinang Motion Reiterating The Prayer For The Issuance Of A Temporary Restraining Order na inihain ng Makabayan Bloc, iginiit nito na pigilan ang pagpapatupad ng Republic Act 11479 o Anti-Terrorism Act of 2020 dahil sa lumalala na umanong polisiya at practice ng red tagging, o terrorist tagging ng militar, pulisya at ng National Task Force To End Local Communist Armed Conflict o ang NTF-ELCAC.
Binigyan diin ng grupo, sa kasalukuyan 37 na ang petisyong naihahain laban sa nasabing batas na maituturing na nag-iisang batas na umani ng maraming pagtutol sa kasaysayan ng bansa.
Habang nakasaad pa anila, sa general appropriations bill na mahigit sa P260 bilyon ang gagastusin sa anti-terrorism program ng gobyerno kabilang na ang mahigit sa P19 bilyon na pondo nito na hahawakan ng NTF-ELCAC, kung saan P16.44 bilyon ang gagamitin sa barangay development program.
Iginiit pa na dahil sa official media post ng gobyerno, kung saan tinukoy umano ng NTF-ELCAC ang Makabayan Bloc at bawat isang miyembro nito bilang communist terrorist group at high ranking officials ng CPP-NPA-NDF.
Kabilang din sa idinahilan ang maliscious at slanderous posts umano ni Presidential Communications Coordination Office (PCOO) Undersecretary at miyembro ng NTF-ELCAC Lorraine Badoy, na ang petisyuner at Makabayan ay target ng batas.
Nagiging banta anila, sa buhay nila at kanilang pamilya ang ginagawang red tagging ng militar.
Tinukoy din ang naging pahayag ni House Speaker Lord Velasco na nagsasabing ang ginagawang red tagging ni Lt. General Antonio Parlade Jr. sa mga miyembro ng House of Representatives ay banta at panganib sa buhay ng mga elected officials.
- Latest
