Duterte kokomprontahin si Poe
MANILA, Philippines – Kokomprontahin ni Pangulong Duterte si Sen. Grace Poe upang personal na ibulalas dito ang kanyang emosyon matapos harangin ng senadora ang pagkakaloob ng emergency powers sa Pangulo sa pagdinig ng Senado kamakailan.
Iminungkahi ni DOTr Sec. Arthur Tugade sa Senado na bigyan ng emergency powers si Pangulong Duterte upang mahanapan ng solusyon ang grabeng trapik sa EDSA subalit muli itong kinontra ni Poe.
Katwiran ng mambabatas ay hindi na kailangan ang emergency powers upang walang maging sagabal sa procurement process dahil sapat na ang umiiral na batas hinggil dito at pangamba pa ni Poe na pagmulan ito ng corruption.
Ayon sa Pangulo, tingin ni Poe sa kanyang sarili ay siya na lamang ang tanging indibidwal sa buong mundo na may natitirang integridad at katapatan.
Muli ay binigyang-diin ni Duterte na wala na siyang interes sa posibilidad na mabigyan pa siya ng emergency powers para hindi na rin aniya siya mapaghinalaan pa na kukurakutin lang ang pera ng bayan gaya ng nais aniyang palabasin ni Poe.
- Latest
